Юпа уйӑхӗн 2-мӗшӗнче Пӗтӗм тӗнчери музыка диктанчӗ иртӗ. Унта хутшӑнма Раҫҫейӗн 48 регионӗ кӑмӑл тунӑ. Ҫав йыша пирӗн республикӑмӑр та кӗнӗ. Хамӑр ҫӗршыврисемсӗр пуҫне акцие тӗнчери тата тепӗр 4 ҫӗршывран хутшӑнӗҫ.
Чӑваш Енре музыка диктантне Чӑваш патшалӑх культурӑпа ӳнер институтӗнче, Шупашкарти 2-мӗш ӳнер шкулӗнче, Ҫӗнӗ Шупашкарти ача-пӑча ӳнер шкулӗнче, Канашри музыка шкулӗнче тата Ҫӗмӗрлери 1-мӗш ӳнер шкулӗнче ҫырма май килӗ.
Диктанта Пӗтӗм тӗнчери музыка кунне тата Раҫҫей джазӗн 100 ҫулхине халаллӗҫ.
Акцие хутшӑнакансен тӗрлӗ шайри диктант ҫырма тивӗ: ятарлӑ пӗлӳ илмен ҫынсем валли музыка ритмӗ ҫырнинчен пуҫласа кӑткӑс виҫӗ сасӑллӑ композици хатӗрлесси таранах.
Кӑҫалхи диктантӑн тӗп уйрӑмлӑхӗ — джаз енӗ.
Диктанта хутшӑнакансене паянтан, авӑн уйӑхӗн 25-мӗшӗнчен, https://musdict.ru сайтра регистрацилеме тытӑннӑ.
Канаш хула администрацийӗн пуҫлӑхӗн ҫумне явап тыттарнӑ. Атӑлҫи регионсем хушшинчи ҫутҫанталӑк прокуратуринче хыпарланӑ тӑрӑх, Шупашкарти ҫутҫанталӑка сыхлакан районсем хушшинчи прокуратура канашсем каяша тирпейлес ӗҫе епле пурнӑҫланине тӗрӗсленӗ.
Хула администрацийӗн пуҫлӑхӗн ҫумӗ — ҫурт-йӗрпе коммуналлӑ хуҫалӑх пайӗн пуҫлӑхӗ Евгений Козлов надзор органӗн ыйтӑвне ыйтнине вӑхӑтра хуравламан.
Прокурор ыйтнине пӑхӑнманшӑн Канашри тӳре-шара административлӑ майпа явап тыттарса 2 пин тенкӗ штраф хурса панӑ.
Чӑваш Республикин Ача-пӑчапа ҫамрӑксен вулавӑшӗ чӑваш халӑх писателӗпе Михаил Юхмапа воркшоп (акӑлчан чӗлхинчен чӑвашла куҫарсан ҫак сӑмаха «вӗрентӳ» тесе ӑнланма пулать) ирттернӗ.
Тӗлпулӑва «АнимаТус» мультстуди видеоҫыхӑну мелӗпе Ҫӗнӗ Шупашкарти вулавӑшра, Пӑрачкав районӗнчи тӗп вулавӑшра, Канашри вулавӑшра трансляциленӗ.
Вулавӑшра пӗлтернӗ тӑрӑх, Юхма Мишши — писатель, драматург, Пӗтӗм чӑвашсен культура центрӗн президенчӗ, Чӑваш ҫыравҫисен союзӗн правленийӗн председателӗ; Чӑваш Республикин, Мари Элӗн, Тутарстанӑн тата Удмурт Республикин культурӑн тава тивӗҫлӗ ӗҫченӗ. Вӑл тӗнчери литература премийӗсене (ҫав шутра А. Фадеев, В. Пикуль, К. Симонов, М. Шолохов ячӗллӗ премисене) тивӗҫнӗ. Ӑна «Чӑваш Республики умӗнчи тава тивӗҫлӗ ӗҫсемшӗн» орденпа чысланӑ.
Шупашкарта авӑн уйӑхӗн 10-мӗшӗнчен «Кӗр парнисем» ял хуҫалӑх ярмӑркки ӗҫлеме пуҫлассине нумаях пулмасть пӗлтернӗччӗ. Ял хуҫалӑх министерстви пӗлтернӗ тӑрӑх, унашкал ярмӑрккӑсем республикӑри тепӗр виҫӗ хулара ӗҫлӗҫ: Улатӑрта, Канашра тата Ҫӗнӗ Шупашкарта.
Ҫӗнӗ Шупашкарта Винокуров урамӗнчи 2-мӗш, 64-мӗш тата 10-мӗш ҫуртсем, Женя Крутова урамӗнчи 22-мӗш ҫурт ҫывӑхӗнче ярмӑрккӑ ӗҫлӗ. Улатӑрта Стрелка микрорайонта, К.Иванов, Комаров урамӗсенче ял хуҫалӑх продукцине туянма май пур. Канашра хула ярмӑрккинче пахча-ҫимӗҫе, ытти продукцие йӳнӗрехпе сутӗҫ.
Канаш хулинче IT-теплица уҫма шухӑшлаҫҫӗ. Капла пуҫарӑва Канашри IT-куб сӗннӗ.
Вӗренӳ центрӗн ӗҫӗ-хӗлӗпе Дмитрий Краснов вице-премьер тата цифра аталанӑвӗн министрӗ Кристина Майнина паллашнӑ.
Цифра вӗрентӗвӗн центрӗ Канашра 2019 ҫулта уҫӑлнӑ.
Унта Python программӑпа программӑлама, VR тата AR-приложенисем йӗркелеме, системӑна администрацилеме, цифра гигиенине вӗренеҫҫӗ.
IT-кубӑн партнерӗсем — Яндекс, Samsung корпорацисем, Касперский лабораторийӗ, 1С, Шупашкарти «Экра».
Канаш хулинче пӗр арҫын хӑйӗнпе пӗр класра вӗреннӗ тусне вӗлернӗ.
59 ҫулти арҫын кӑҫалхи утӑ уйӑхӗн 7-мӗшӗнче Канашри общежитисенчен пӗринче тусӗпе тӗл пулнӑ. Ҫав арҫынпа вӗсем пӗр класра вӗреннӗ. Ытти чухне ялан юлташлӑ пурӑннӑскерсем ҫав каҫхине тавлашса кайнӑ. Хӑна алла ҫӗҫӗ ярса илнӗ те унпа чикнӗ.
Шар курнине больницӑна ӑсатнӑ-ха. Анчах тухтӑрсем унӑн пурнӑҫне ҫӑлса хӑварайман. Йывӑр суранланнӑ арҫын тепӗр икӗ кунтан вилсе кайнӑ.
Алла ҫӗҫӗ ярса илсе унпа ҫынна чикнӗ этем тӗлӗшпе пуҫиле ӗҫ пуҫарнӑ.
Ҫӗрпӳ хулипе Пӑрачкав ялӗ Пӗтӗм Раҫҫейре хулара хӑтлӑх кӗртес енӗпе хатӗрленӗ проектсен конкурсӗнче ҫӗнтерӳҫӗ пулнӑ. Ҫапла вӗсем 70-шер миллион тенкӗ ҫӗнсе илнӗ.
Ку укҫапа Ҫӗрпӳре хулан кивӗ пайӗнче вырнаҫнӑ ача пахчине тата ун ҫывӑхӗнчи урамсене хӑтлӑлатӗҫ. Пӑрачкавра вара Коопераци урамне илем кӗртӗҫ. Унта культурӑпа архитектура еткерлӗхӗн объекчӗсем нумай. Вӗсен ку ӗҫсене 2023–2024 ҫулсенче тумалла.
Палӑртмалла: ытти ҫулсенче ку конкурсра Канаш, Сӗнтӗрвӑрри, Етӗрне, Улатӑр, Ҫӗмӗрле хулисем ҫӗнтернӗ. Кӑҫал конкурса 75 регионтан 280 заявка килнӗ. 160 проект ҫӗнтернӗ.
Паян Тӑвай районӗнче автобус ҫырмана ҫаврӑнса ӳкнӗренпе 20 ҫул ҫитнӗ. Ку инкек шӑп та лӑп ҫурлан 18-мӗшӗнче, 2002 ҫулта, пулнӑ.
Автобус Тӗнеялӗнчен Канаша кайма тухнӑ. Ун чухне Шупашкар хули ҫуралнӑ кунне паллӑ тунӑ. Инкек пулсан та мероприятисене пӑрахӑҫламан.
Аварире 25 ҫыннӑн пурнӑҫӗ татӑлнӑ. Вӗсен йышӗнче - 5 ҫулти ача. Салонра пӗтӗмпе 60 ҫын пулнӑ. 38 ҫын аманнӑ.
Халӗ ҫав вырӑнта часавай лартнӑ. Ӑна 2012 ҫулта уҫнӑ.
2020 ҫулхи авӑн уйӑхӗн 4-мӗшӗнче Канашри 48 ҫулти арҫын икӗ ҫамрӑка хӑйӗн хваттерне тара панӑ. Тепӗр кунхине ирхи 1 сехет тӗлӗнче ун патне кӳршисем шӑнкӑравланӑ, хваттерте питӗ шавлаҫҫӗ тесе евитленӗ. Хваттер хуҫи ҫамрӑксем патне шӑнкӑравланӑ, анчах лешсем телефона тытман. Ҫавӑн хыҫҫӑн арҫын хӑйӗн арӑмӗпе ҫав хваттере ҫул тытнӑ. Каччӑсемпе хваттер хуҫи хирӗҫсе кайнӑ. Ӳсӗр ҫамрӑк 48 ҫулти арҫынпа ҫапӑҫма пуҫланӑ. Ӑна вӑл 4 хутран кая мар чышкӑпа ҫапнӑ, 1 хутчен кӗленчепе пуҫӗнчен кӗрӗслетнӗ.
Кил хуҫи пуҫтахран тарса балкон ҫине тухнӑ. Унта каччӑ арҫынна уҫӑ чӳречерен тӗксе янӑ. Лешӗ ӳкес мар тесе балкон чӳречин раминчен ярса илнӗ. Анчах каччӑ ӑна аллинчен кӗленчепе ҫапма тытӑннӑ.
Арҫын виҫҫӗмӗш хутран персе аннӑ, анчах ӑна вӑхӑтра пулӑшнине кура вӑл чӗрӗ юлнӑ.
Йӗпреҫ районӗнчи 19 ҫулти каччӑ тӗлӗшпе ҫынна вӗлерме тӑнӑ тесе пуҫарнӑ пуҫиле ӗҫе халӗ суда ярса панӑ.
Канаш хулинче пурӑнакан арҫынна ҫирӗп режимлӑ колоние 9 ҫуллӑха ӑсатма йышӑннӑ. 52 ҫулти арҫын тӑван пиччӗшне вӗлернӗ.
Вӑл 84 ҫулти амӑшӗпе тата 59 ҫулти пиччӗшӗпе пӗрле пурӑннӑ. Кӑҫалхи нарӑс уйӑхӗн 12-мӗшӗнче ҫав арҫын пиччӗшӗпе хирӗҫсе кайнӑ. Малтан вӑл ӑна хӗнесе пӗтернӗ, кайран аллине икӗ ҫӗҫӗ ярса илсе 6 хутран кая мар чикнӗ. Шар курни кӑштахран вилсе кайнӑ.
Сӑмах май каласан, пиччӗшне икӗ ҫӗҫӗпе чиксе пӗтернӗ этем унччен те судпа айӑпланнӑ.
+12.5 °C