Куславкка районӗнче хресчен олимпиади пӗрремӗш хут иртнӗ. Унта республикӑри ачасем хутшӑннӑ, хӑйсем ял хуҫалӑхӗнче мӗн пӗлнине тӗрӗсленӗ. Качака мӗн чухлӗ пурӑнать? Вӑрлӑха епле хатӗрлемелле? Йӑлтах хуравлама тивнӗ ачасен.

Партӑсем ҫинче ҫӗрулми, курӑк, тӑпра выртнӑ. Ачасем ӗҫсене тӗплӗн, тимлӗн пурнӑҫланӑ. Хресчен олимпиади пӗрремӗш хут иртнӗрен ачасем те, вӗрентекенсем те мӗнле хатӗрленмеллине пӗлмен.

Чӗрчунсем, пахча ҫимӗҫ пирки те ыйтусем пулнӑ. Олимпиада Тӗрлемес шкулӗнче иртнӗ. Унта ытларах Канаш, Комсомольски, Куславкка районӗсенчен килнӗ. Тӗлӗнмелле те, пӗрремӗш Шупашкарти 59-мӗш шкул хутшӑнма шутланӑ.

Тупӑшу икӗ тапхӑрпа иртнӗ. Кӑнтӑрлаччен ачасем чӗрчунсем, ҫӗр ӗҫӗ пирки ыйтусене хуравланӑ. Унтан пултарулӑх ӗҫне пунӑҫланӑ. Ачасем чӑн-чӑн бизнес-план хатӗрленӗ. Вӗрентекенсем те кӑсӑкланнӑ кунпа, ӗҫсен пурнӑҫланӑ.

Олимпиадӑна ирттерес шухӑш Куславкка районӗнчи Василий Семенов фермерӑн ҫуралнӑ. Вӑл унта ӑсталӑх класӗ те ирттернӗ. Олимпиадӑна ирттерес шухӑша чиновниксем, ӑсчахсем, фермерсем те ырланӑ. Пӗрисем ыйтусене хатӗрлеме пулӑшнӑ, теприсем спонсор пулӑшӑвӗ панӑ.

Ачасен ӗҫӗсене пӗтӗмлетмешкӗн пӗр эрнерен кая мар кирлӗ. Ӗҫсене «Энеж» фермер хуҫалӑх ӗҫченӗсем хаклӗҫ, ҫӗнтерӳҫӗсене парнесемпе хавхалантарӗҫ.

#Куславкка районӗ, #олимпиадӑсем, #Тӗрлемес, #шкулсем, #Канаш районӗ, #Комсомольски районӗ, #Шупашкар, #54-мӗш шкул, #ял хуҫалӑхӗ