Нарăсăн 10-мĕшĕнче Чăваш Республикин вĕрентӳ институчĕн шкул çулне çитменнисен тата пуçламăш классен кафедри тата «Чăваш Ен вĕрентӳçисен ассоциацийĕн» пуçламăш клас вĕрентекенĕсен секцийĕ Элĕкри И.Я. Яковлев ячĕллĕ пĕтĕмĕшле вăтам пĕлӳ паракан шкулта «Формирование индивидуальной траектории развития учащихся начальных классов в информационной среде школы» семинар ирттерчĕç. Семинара Шупашкарпа Çĕнĕ Шупашкарти тата Çĕмĕрле районĕнчи пуçламăш классен вĕрентекенĕсем хутшăнчĕç.

Хăнасене шкулăн пуçламăш класĕсенче тĕрлĕ тĕслĕ уçă уроксене кăтартрĕç. Волков В.Г. директор пĕлтернипе, халĕ шкулта çĕнĕ информаци технологисемпе анлă усă кураççĕ. Директора информаципе компьютер технологийĕсем тĕлĕшĕнчен пулăшакан Толмачев С.Г. шкулăн пĕтĕмĕшле информаци уçлăхĕнчи пуçламăш звено епле ĕçлени пирки каласа пачĕ, тĕслĕх валли NetSchool программăна илчĕ. Путеров В.М. инженер-программист Moodle системăпа паллаштарчĕ.

Семинарăн тĕп пайĕ вĕçленнĕ хыççăн шкул хăнисем Элĕкри литературăпа таврапĕлӳ музейне çитсе курчĕç. Музей И.Я. Яковлев никĕсленĕ шкулăн кивĕ çуртĕнче вырнаçнă. Музей Терентьев Г.К. педагог-ветеран пуçтарнă интереслĕ материалпа пуян. Кунта тăтăшах шкул ачисен наципе патриотика пĕлĕвне ӳстереççĕ.