Конкурса хӑтшӑннисем

Чӑваш Республикин вӗренӳ институтӗнче паян чӑваш чӗлхи вӗрентекенӗсен хушшинче «Эпир пулнӑ, пур, пулатпӑр» конкурс иртрӗ. Вӑл пурӗ тӑватӑ пайран тӑчӗ: «Тӑван ен, манӑн шкул, манӑн педагогикӑри ӗҫӗм» паллаштару, «Манӑн педагогикӑри тӗп шухӑш» эссене хӑтлани, ӑста урокӗ ирттерни тата ҫавӑн пекех курава тӑратнӑ конкурс материалӗсене тишкерни пулчӗ.

Пурӗ 9 вӗрентекен тупӑшрӗ: Канаш районӗн Шӑхасан шкулӗнчи Шерки Эльвира Николаевна, Ҫӗмӗрле районӗн Якуртушкӑнь шкулӗнчи Албутова Надежда Михаловна, Етӗрне районӗн Чирӗккасси шкулӗнчи Токарева Марина Васильевна, Элӗк районӗн Чӑваш Сурӑм шкулӗнчи Петрова Алина Геннадьевна, Красноармейски районӗн Мӑн Шетмӗ шкулӗнчи Назарова Светлана Михайловна, Муркаш районӗн Чуманкасси шкулӗнчи Ефимова Альбина Николаевна, Вӑрнар районӗн Уравӑш шкулӗнчи Ермошкина Раиса Николаевна, Елчӗк районӗн Кӗҫӗн Таяпа шкулӗнчи Иванова Алевтина Афанасьевна, Шупашкар хулин 43-мӗш шкулӗнчи Тяхмусова Светлана Вячеславовна. Вӗсенчен кашни маларах район шайӗнчи конкурсенче ҫӗнтернӗ.

Мала тухас тесе кашни вӗрентекен тӑрӑшрӗ — ара, ҫӗнтерекенӗн Мускаври конкурсра чӑваш чӗлхи вӗрентекенӗсен чысне хӳтӗлеме тивет-ҫке. Сӑмах май ку конкурс кӑҫалхипе виҫҫӗмӗш хут иртет. Иртнӗ ҫулхисем те Мускавра маххӑ паман, малти вырӑнсем йышӑннӑ.

Паянхи конкурсра вара Канаш районӗнчи вӗрентекен Шерки Эльвира Николаевна ҫӗнтерчӗ. Ыттисем вара тӗрлӗ номинантсем пулчӗҫ, нихӑшне те кӳрентермерӗҫ.

Сӑнсем (26)

#Шӑхасан, #Якуртушкӑнь, #Чирӗккасси, #Чӑваш Сурӑм, #Мӑн Шетмӗ, #Чуманкасси, #Уравӑш, #Кӗҫӗн Таяпа, #Шупашкар, #Канаш районӗ, #шкулсем, #конкурссем, #чӑваш чӗлхи