Марат Никитин

Чӑваш Енре «Хорло» тулли метражлӑ фильм ӳкерме палӑртнӑ. Режиссерӗ — Марат Никитин. Вӑл Ҫӗнӗ Шупашкарта ҫуралса ӳснӗ. Фильм мӗн пирки пулӗ-ха?

Марат Никитин каланӑ тӑрӑх, Хорло ятлӑ хӗр аслашшӗпе ҫынсенчен аякра пурӑнать. Вӗсем утар тытаҫҫӗ, пыл сутаҫҫӗ. Вӗсене урӑх нимӗн те кирлӗ мар. Анчах пӗррехинче Хорло сарайра аманнӑ арҫынна Соктона тупать. Хорла ӑна юратса пӑрахать, арҫынна сыватас тесе вилнӗ амӑшӗн пулӑшу ыйтать. Лешӗ пулӑшать. Анчах Сокто сывалнӑ хыҫҫӑн ҫухалать. Хорлон вара ҫие юлать. Аслашшӗне каламасӑр полицире ӗҫлекен инкӗшӗ патне каять. Соктона СИЗОра шыраса тупаҫҫӗ. Вӑл темиҫе эрне каялла тарнӑ преступник-мӗн. Халӗ вӑл Хорлона палламасть те тейӗн. Инкӗшӗ Хорлона аборт тума хистет, анчах хӗр ачана хӑварма йышӑнать. Вӑл каллех хӑйӗн тӗнчине, аслашшӗ патне, таврӑнать.

Сценӑсене пӗр вырӑнта кӑна мар ӳкерӗҫ. Ӳкерӳ Ҫӗрпӳ, Красноармейски, Сӗнтӗрвӑрри районӗсенче, Канаш ҫывӑхӗнче, Йӗпреҫре пулӗ. Тӗп эпицентр чӑваш ялӗ пулӗ.

Чи малтанах фильма Пушкӑрт Республикинче ӳкерме палӑртнӑ. Анчах ку тӑкаклӑ-мӗн. Чӑваш Енре хитре вырӑнсем нумай. Марат ҫурла уйӑхӗнче республикӑна килнӗ, районсем тӑрӑх ҫӳренӗ те вырӑнсене сӑнанӑ.

Харло сӑнарне Хусанти хӗр калӑплӗ. Сакто — Чулхуларан. Эпизодсенче Чӑваш патшалӑх драма театрӗн тата Ҫамрӑксен театрӗн артисчӗсем пулӗҫ. Ытти тӗп роль Мускаври актерсене те лекнӗ. Авӑнӑн 29-мӗшӗнче Чӑваш Ене ӳнерҫӗсемпе постановщиксем килӗҫ, объектсене хатӗрлеме тытӑнӗҫ. Фильм 1 сехет те 20 минута тӑсӑлмалла. Ӑна кинофестивальре кӑтартма палӑртнӑ. Кун пек картинӑсене прокатчиксем кӑмӑлламаҫҫӗ. Ку фильм философиллӗ-ҫке-ха, пуҫа шухӑшлаттарать.

#Сӗнтӗрвӑрри районӗ, #Красноармейски районӗ, #Ҫӗрпӳ районӗ, #Ҫӗнӗ Шупашкар, #Чулхула, #кино, #Канаш, #Йӗпреҫ, #фильмсем, #культура