2009 çулхи акан 8-мĕшĕнче Элĕкри И.Я. Яковлев ячĕллĕ вăтам шкулта пуçламăш класс вĕрентӳçисен ирĕкри семинарĕ иртрĕ. Çак пархатарлă ĕçе Тутарстан, Пушкăрт Республикин, Самар тата Чĕмпĕр облаçĕсен пуçламăш класс шкул вĕрентӳçисем пуçтарăнчĕç. Семинара ЧРИО ĕçтешĕ педагогика ăслăлăхĕсен кандидачĕ Е.П. Кондратьева доцент ертсе пычĕ.

Элĕкри вăтам шкулти пуçламăш класс вĕрентӳçисем аслă категориллĕ ăстаçăсем Т.Г. Чашкова, Ф.Н. Иванова, Н.Л. Иванова, Г.Г. Арсентьева кӳршĕ республикăсемпе облаçсенчи шкул ĕçтешĕсем валли наци шкулĕнчи чăваш чĕлхи уçă урокĕсене, çаплах уроксем хыççăн 1-4 классенче вĕренекенсемпе вăйăпа хевтелĕх ĕçĕсене ирттерсе кăтартрĕç.

Семинарпа пĕрлех шкул директор ĕçĕсене тытса пыракан В. К. Волков мультимедиапрезентаци меслечĕпе Элĕк шкулĕн пурнăçĕпе пĕтĕм енлĕ паллаштарчĕ. В.М. Путеровпа Т.Г. Чашкова авторсен электронлă пулăшу хатĕрĕсен семинарĕ те иртрĕ.

Аякри чăваш вĕрентӳçисем Элĕкри литературăпа тăван ен тĕпчев халăх музейне çитсе курчĕç.

Хăнасем уроксемпе семинара хавхаланса ырларĕç, вĕрентӳçĕсене уроксемшĕн, шкулра хăйсене хапăл йышăннăшăн чĕререн тав турĕç, малашне те пултарулăх ĕçĕсенче ăнăçу сунса сывпуллашрĕç.