Куславккасем — Акатуйра

Ӗнер Куславкка районӗн халӑхӗ Атӑл хӗррине пухӑннӑ. Ахальтен мар. Вӗсем ака-суха вӗҫленнине палӑртнӑ. Ҫанталӑк ҫумӑрлӑ, сивӗ тӑни темех мар — куславккасем Акатуя савӑнӑҫлӑн уявланӑ.

Пултарулӑх ушкӑнӗсем лапамра чӑваш халӑх юррисене шӑрантарнӑ. Хӑнасем ял тӑрӑхӗсем йӗркеленӗ «картишсене» кӑсӑкланса сананӑ, алӗҫ ӑстисен пултарулӑхӗпе паллашнӑ. «Картиш» хуҫисем хӑнасене чӑваш сӑрипе, кукӑльпе, ытти ҫимӗҫпе хӑналанӑ.

Ҫак кун Куславккара икӗ теплоход чарӑннӑ, унти ҫынсем район уявне курса киленнӗ. Уяв пуҫламӑшӗнче А.Манюкова ҫамрӑк юрӑҫ Ҫӗр гимнне шӑрантарнӑ. Унтан сцена ҫине район ертӳлӗхӗ тата хӑнасем тухнӑ. Акатуя районтан ҫеҫ мар, ытти тӑрӑхран та хӑнасем ҫитнӗ. Акатуя Куславкка район администрацийӗн пуҫлӑхӗ В.Колумб уҫнӑ. Сцена ҫинче ял хуҫалӑхӗнче пысӑк ҫитӗнӳсем тунисене чысланӑ. «Атӑл» физкультура комплексӗн преподавательне В.Конюкова «ЧР вӑй-хал культурипе спортӑн тава тивӗҫлӗ ӗҫченӗ» ята панӑ. Чи лайӑх механизаторсене, ял хуҫалӑх предприятийӗсен ертӳҫисене, ҫӗр ӗҫченӗсене ЧР Ял хуҫалӑх министерствин Хисеп грамотипе чысланӑ. Фермер хуҫалӑхӗн пуҫлӑхне Н.Афанасьева хуҫалӑхне аталантармашкӑн 1 миллион та 68 пин тенкӗлӗх грант панӑ. Ӗҫри ҫитӗнӳсене кура тата район аталанӑвне пысӑк тӳпе хывнӑшӑн Куславкка районӗн Хисеп грамотипе, «Пӗрлӗхлӗ Раҫҫейӗн» Чӑваш Енри уйрӑмӗн Тав ҫырӑвӗпе чысланӑ.

Акатуй Раҫҫей кунӗпе пӗр килнӗрен куславккасем «Раҫҫей гимнне юрлатпӑр» акцие хутшӑннӑ. Велочупу, скутерсен парачӗ Куславкка хулин урамӗсенче иртнӗ. Наци кӗрешӗвӗнче вӑй виҫнӗ. Ҫӗнтерӳҫӗ йӑлапа килӗшӳллӗн такана тивӗҫнӗ. Акатуйра спортӑн ытти тӗсӗнче те ӑмӑртнӑ.

Сӑнсем (135)

#Акатуй, #Куславкка районӗ, #хӑнасем, #Куславкка, #уявсем, #кӗрешӳ