Чӑвашла тата вырӑсла усӑ курнӑ тӗслӗх. Pertanlah блогри сӑн

Тӗнче тетелӗнче Чӑваш Енре патшалӑхӑн икӗ чӗлхипе усӑ курнине хаклакан мониторинга халалланӑ блог тунӑ. Хальлӗхе pertanlah журналта (чӑвашла «пӗртанлӑх» — «равноправие») 700 ытлӑ сӑнӳкерчӗк пичетленнӗ. Унта чӑваш тата вырӑс чӗлхипе ӑнӑҫлӑ усӑ курнисем те, республикӑри чӗлхе саккунне пӑснӑ тӗслӗхсем те пур.

Журнал авторӗсем палӑртнӑ тӑрӑх, ҫакна Чӑваш Республикинчи патшалӑхӑн икӗ чӗлхине пӗр тан усӑ курманнине кӑтартас тӗллевпе йӗркеленӗ. Тӗслӗхсем илсе кӑтартнӑ.

«Чылай чухне пӗр чӗлхепе ҫеҫ усӑ кураҫҫӗ. Вӑл — ялан тенӗ пекех вырӑс чӗлхи. Ҫапла майпа граждансен прависене пӑхӑнмаҫҫӗ. Ку Чӑваш Республикин сакунне пӑсни те. Саккун патшалӑхан икӗ чӗлхи те пӗр тан пулнине калать», — тенӗ журналта. Тӗслӗхрен, ҫул ҫинчи паллӑсене вырӑсла ҫеҫ ҫыраҫҫӗ.

«Юлашки 20 ҫулта ҫул ҫинчи чылай палла, урам, общество чарӑнӑвӗсен ячӗсене улӑштарнӑ, патшалӑх учрежденийӗсен умӗсене юсанӑ, — тенӗ блогра. — Анчах хӑш-пӗр ҫӗрте ҫеҫ ҫакӑнпа усӑ курса объект ячӗсене вырӑсла та, чӑвашла та ҫырнӑ. Тӗслӗхрен, патшалӑх ҫурчӗсене, автостанцисене, спорт центрӗсене уҫнӑ чухне алӑк ҫинче чӑвашла-вырӑсла ҫырнӑ пӗчӗк вывескӑсене ҫеҫ курнӑ эпир. Етӗрне хулинче, унти халӑхӑн 66 проценчӗ чӑваш пулин те, вырӑнти тӳре-шара 1990 ҫултанпа урам, чарӑну ячӗсене ҫырнӑ чухне патшӑлӑхӑн икӗ чӗлхипе усӑ курмашкӑн май тупайман-ха».

«Ҫурт умӗнче икӗ чӗлхепе ҫырнине кураймасан шалта кунашкаллине тупма тата йывӑртарах, — ҫырнӑ малалла журналта. — Ачасене воспитани памалли вырӑнсенче, культура керменӗсенче, парксенче, ача-пӑча поликлиникисенче пӗр чӗлхепе усӑ курни ҫеҫ ытларах шухӑшлаттарать».

Мониторинг ертӳҫисем вывескӑсене икӗ чӗлхепе тумашкӑн укҫа-тенкӗ кирлине тунмаҫҫӗ. Анчах кивӗ табличкӑсене планпа килӗшӗллӗн улӑштарнӑ чухнех икӗ чӗлхепе ҫырсан укҫа самай перекетленине палӑртнӑ. Вӗсем транспортра вырӑс тата чӑваш чӗлхисемсӗр пуҫне ытти чӗлхепе усӑ курнине хирӗҫ мар-мӗн.

Pertanlah блога икӗ чӗлхепе йӗркелесе пыраҫҫӗ.

#чӑваш чӗлхи, #вырӑс чӗлхи, #кун кӗнекисем, #сайтсем