Тӑван ҫӗршыва хӳтӗлевҫин кунӗнче Мурманск облаҫӗнчи «Чӑваш ен» культура обществин делегацийӗ Северодвинск хулин портӗнче тӑракан «Ушаков адмирал» эскадра миноносецӗ ҫинче пулса курнӑ. Хӑнасене хисеп туса карап ҫинче ялав ҫӗкленӗ, митинг ирттернӗ. Чӑваш культура обществин ертӳҫи Валериан Гаврилов Тинӗс ҫар флотӗнче хӗсметре тӑракан яшсене, ҫав шутра чӑваш каччисене те, уяв ячӗпе саламланӑ, ҫирӗп сывлӑх, ӑнӑҫу суннӑ. Мурманскри «Шупашкар» пӗрлешӗвӗн тӗп директорӗ Дмитрий Осипов вара карап экипажне телевизор тата тӑван республикӑра туса кӑларнӑ пылак ҫимӗҫ парнеленӗ.

Карап командирӗ Олег Гладкий 1 ранг капитанӗ чӑваш ачисем хӗсметре маттур пулнине палӑртнӑ, чи хастаррисене черетлӗ звани парасси ҫинчен хушу вуласа панӑ.

Карап историйӗпе паллашнӑ хыҫҫӑн уяв кают-компанире тӑсӑлнӑ. Хӑнасем моряксене тепӗр пысӑк парне тунӑ — чӑваш юрри-ташшипе савӑнтарнӑ. Итлекенсем Светлана Абрашкина юрӑҫа уйрӑмах тӑвӑллӑн алӑ ҫупса тав тунӑ. Концерт вӗҫленсен делегаципе пӗрле килнисем чӑваш ачисемпе куҫа-куҫӑн тӗл пулса калаҫнӑ, кам ӑҫтан пулнине ыйтса пӗлнӗ. Паллах, пурте хутшӑнайман ҫак калаҫӑва — хӗсметре-ҫке! Ҫапах та Алексей Иванов (Вӑрмар районӗнчен), Кирилл Леонтьев (Канаш хулинчен), Николай Васильев (Чӗмпӗр облаҫӗнчен), Владислав Геронтьев (Кемӗр облаҫӗнчен), Максим Муратов (Пушкӑртстанран) тӑван чӗлхепе калаҫса савӑннӑ, кайран пурте пӗрле асӑнмалӑх сӑн ӳкерӗннӗ.

Ентешсем малашне те килсе ҫӳреме шантарса сывпуллашнӑ.

#Северодвинск, #Мурманск облаҫӗ, #тӗлпулусем, #хӗсмет, #тинӗс ҫарӗ, #Канаш, #Вӑрмар районӗ, #Чӗмпӗр облаҫӗ, #Раҫҫейре, #Пушкӑртстан