«Контактри» сӑн

Паян, ҫурла уйӑхӗн 14-мӗшӗнче, Пыл сӑпасӗ. Ҫавна май Чӑвашстат пылпа ҫыхӑннӑ хисепсемпе паллаштарнӑ.

Ведомство пӗлтернӗ тӑрӑх, пӗлтӗр республикӑра 917 тонна пыл туса илнӗ. Пӗрре виҫҫӗмӗш пайне Пӑрачкав, Ҫӗмӗрле тата Етӗрне районӗсенче туса илнӗ. Чӑваш Енре пӗтӗмпе 37 пин вӗлле шутланать, вӗсенчен кашнинчен вӑтамран 23 килограмм пыл туса илнӗ.

Чӑваш пылне пирӗн республикӑра кӑна мар, ытти регионта та хаклаҫҫӗ. Акӑ Йӗпреҫ районӗнчи Лариса Анисимова пӗлтӗр «Раҫҫейри ылтӑн пыл» тата «АпиДар» конкурссенче иккӗмӗш вырӑн йышӑннӑ.

Пурнӑҫ хакланса пырать. Кӑҫал пыл хакӗ те ӳснӗ – вӑл 12-16 процент хакланнӑ. Апла-и, капла-и – чӑваш пылӗ яланах пысӑк пахалӑхлӑ пулнӑ.

#статистика, #Йӗпреҫ районӗ, #Пӑрачкав районӗ, #Ҫӗмӗрле районӗ, #Етӗрне районӗ