Чӑваш Енре 30 ытла суйлав кампанийӗ иртмелле. Кун пирки Regnum информаци агентстви республикӑн Тӗп суйлав комиссийӗ пӗлтерни ҫине таянса хыпарлать. Авӑнӑн 8-мӗшӗнче хӑш-пӗр ҫӗрте республикӑн парламентне депутатсем суйланипе пӗрлех вырӑнти хӑйтытӑмлӑх органӗсен пуҫлӑхӗсене суйлассипе тата вырӑнти халӑх тарҫисене суйлассипе сасӑлавсем иртмелле.

Вӑхӑт ҫитиччен иртекен суйлавӑн сӑлтавӗ тӗрлӗрен. Чӑваш парламентне депутат суйлассине илсен, унӑн вырӑнӗ Куславкка районӗнче пушаннӑ. Асӑнӑн пӗр мандатлӑ округпа депутата суйланнӑ Александр Разумов пӗлтӗрхи раштав уйӑхӗнче Россотрудничествӑна (ӑна Константин Косачев ерсте пырать, Разумов унӑн пулӑшаканӗ пулнӑччӗ) ӗҫлеме куҫнӑччӗ.

Кунсӑр пуҫне 10 ял тӑрӑхӗн пуҫлӑхне суйламалла. Улатӑр районӗнче Атрать тата Ҫӗнӗ Эйпеҫ, Етӗрне районӗнчи Мучар, Стрелецки тата Ирҫе, Сӗнтӗрвӑрри районӗнчи Шуршӑл, Муркаш районӗнчи Ильинкӑри, Пӑрачкав районӗнчи Сиявски, Ҫӗрпӳ районӗнчи Ҫырмапуҫ, Елчӗк районӗнчи Аслӑ Таяпа ял тӑрӑхӗсен пуҫлӑхӗсене суйламалла.

Районти Депутатсен пухӑвӗсене Улатӑр, Вӑрнар, Хӗрлӗ Чутай, Ҫӗрпӳ, Етӗрне тата Тӑвай районӗсенче пушаннӑ вырӑнсене ҫӗнӗрен депутатсем суйламалла. Кунсӑр пуҫне 16 ял тӑрӑхӗнче вырӑнти халӑх тарҫисене палӑртӗҫ.

#Сиявски, #Пӑрачкав районӗ, #Ильинка, #Муркаш районӗ, #Шуршӑл, #Сӗнтӗрвӑрри районӗ, #Ирҫе, #Мувар, #Етӗрне районӗ, #Ҫӗнӗ Эйпеҫ, #Атрать, #Улатӑр районӗ, #суйлав, #пӗрлехи суйлав кунӗ, #Куславкка районӗ, #Ҫӗрпӳ районӗ, #Ҫырмапуҫ, #Елчӗк районӗ, #Аслӑ Таяпа, #Вӑрнар районӗ, #Хӗрлӗ Чутай районӗ, #Тӑвай районӗ