Фестивалӗн пӗтӗмлетӳллӗ саманчӗ

Шупашкар районӗнчи Апаш информаципе культура центрӗнче «Яланах театр» ятпа иртнӗ республикӑри фестиваль-конкурса пӗтӗмлетнӗ.

Халӑх пултарулӑхӗн театрӗсен конкурсӗ кӑрлачӑн 19-мӗшӗнчен пуҫласа ака уйӑхӗн вӗҫӗччен тӑсӑлнӑ. Унта районсемпе хуласенчи 84 театр ушкӑнӗ, ҫав шутра 22-шӗ ача-пӑча коллективӗсем, хутшӑннӑ. Фестиваль-конкурса йӗркеленӗ Республикӑри халӑх пултарулӑх ҫурчӗ театрсем уйрӑмах йышлӑ хутшӑннӑ районсемпе хуласене тишкернӗ те ҫапла пӗтӗмлетнӗ: районсенчен ҫӗрпӳсене (10 ушкӑн), вӑрнарсене (9), патӑрьелсене (6), куславккасене (5), элӗксене (4) тата Канаш хулине (5) кӗртнӗ. Ҫын шучӗпе вара элӗксем, ҫӗрпӳсем, шупашкар енсем (сӑмах район пирки пырать), сӗнтӗрвӑррисем тата Шупашкар хули пысӑк йышпа вылянӑ.

Халӑх пултарулӑхӗн театрӗсене сумлӑран та сумлӑ тӳресем хакланӑ. Вӗсен йышӗнче СССР халӑх артистки Вера Кузьмина, чӑваш халӑх артисчӗсем Анна Кутузова тата Иван Иванов, Чӑваш Республикин тава тивӗҫлӗ артисчӗ Геннадий Кириллов тата Ҫамрӑксен театрӗн артисчӗ Владимир Григорьев пулнӑ.

Ӑмӑртӑвӑн пӗтӗмлетӳллӗ пайӗ 4 сехете тӑсӑлнӑ. Унта хутшӑнма тивӗҫнӗ ушкӑнсем хӑйсен репертуарӗнчи чи ӑнӑҫлӑ спектакльсен сыпӑкӗсене кӑтартнӑ. Вӗсене 20 номинаципе хакланӑ. Тӗп парнене — Гран-прие — Шӑмӑршӑ районӗнчи культура аталану центрӗн театрӗ «Телевизор» тата «Кушак» миниатюрӑсемшӗн тивӗҫнӗ.

#Шупашкар районӗ, #Апаш, #Шупашкар, #Канаш, #театрсем, #халӑх пултарулӑхӗ, #Шӑмӑршӑ районӗ