РБК.Стиль шутланӑ тӑрӑх, «Ютубри» Viki Show канал виҫӗ ҫул хушшинче 44 миллион тенкӗрен пуҫласа 54 миллион таран ӗҫлесе илнӗ. Паянхи кун тӗлне канала 5,4 миллион ҫын пӑхса тӑрать.

2016 ҫулта канала Шупашкарта пурӑнакан 5 ҫулти Вика Соловьева уҫнӑ. Халӗ вӑл 9-та. Малтанах хӗрача видеорозыгрышсем пичетленӗ, камера умӗнче хӑйне евӗр апат тутаннӑ, макияж тунӑ тата ҫулҫӳревӗсем пирки каласа кӑтартнӑ.

Халӗ Вика «Ютуб» валли роликсем ӳкернисӗр пуҫне юрлать, Moscow Fashion Week компанире модельте ӗҫлет. Пӗлтӗр ҫу уйӑхӗнче унӑн «Просто» ятлӑ юррине 34 миллион ҫын пӑхнӑ, ҫулла «Лето» юррипе 41 миллион ҫын кӑсӑкланнӑ.

Пӗлтӗр ҫак канал Раҫҫейре ҫиччӗмӗш вырӑнта пулнӑ. Викӑн Инстаграмри страницине 1,7 миллион ҫын пӑхса тӑрать. Ӑна хӗрача амӑшӗпе пӗрле тытса пырать. Сӑмах май, амӑшӗ Роза «Раҫҫей 24» каналпа чӑвашла хыпарсен кӑларӑмне ертсе пырать. Роликсене вара ашшӗ ӳкерме пулӑшать.

#тӗнче тетелӗ, #Шупашкар