Нумай пулмасть «Эхо Москвы» (чӑв. Мускав ахрӑмӗ) радио эфирӗнче «Сирӗншӗн кӑна» (выр. «Персонально ваш») радиокӑларӑм тухнӑ, унта Алексей Венедиктов Владимир Путин наци чӗлхисене кашни тӑрӑхра мӗнле вӗрентнине тӗрӗслеме ыйтни тавра калаҫу ирттернӗ. Аса илтеретпӗр, нумай пулмасть ҫӗршыв Президенчӗ наци чӗлхисене, вырӑслисӗр пуҫне, вӑйпа вӗрентме юраманни пирки каланӑччӗ.

«Эхо Москвы» радиостанцин тӗп редакторӗ Владимир Путина кунашкал ыйту ҫӗклени наци республикисенче кӑмӑлсӑррисен йышне ӳстерме пултарасси пирки асӑрхаттарнӑ. Ҫавӑн пекех вӑл 1917 ҫулхи Нарӑс пӑлхавӑрӗпе тата Совет Союзӗ арканни хушшинчи пӗрпеклӗхсене асӑннӑ. Ку пулӑмсенче те Раҫҫейри халӑхсен ыйтӑвӗ пӗчӗк пулманнине палӑртнӑ.

Радиокӑларӑм вӑхӑтӗнче пирӗн республикӑпа ҫыхӑннӑ шухӑша та илсе кӑтартнӑ. Денисов текенскер хӑйне чӑваш чӗлхине вӗрентсе самай нушалантарни пирки пӗлтерсен Алексей Венедиктов кун пирки ҫапларах хуравланӑ: «Паллах, кун пек шухӑшсем те пур. Апла пулсан Чӑвашра эсир мӗн тӑватӑр? Илӗр те Липецка куҫӑр — унта унашкал йывӑрлӑх пулмӗ. Е, атьӑр, Чӑваш Ен ятне мӗнле те пулин урӑххи ҫине улӑштарӑпӑр. Ҫук унашкал халӑх, ҫук унашкал чӗлхе. Пурне те вырӑсли ҫине куҫарас та чӗлхепе усӑ курма чарас. Капла та юрать. Ма ҫук-ха?» (вырӑсла вариантне «Эхо Москвы» сайтӗнче пӑхӑр) — тенӗ вӑл.

Денисов текенни Шупашкарта чӑваш чӗлхине ытларах вӗрентни пирки те каланӑ, анчах ку, каламасӑрах паллӑ, суя сӑмах. Сӑмахран 50-мӗш шкулӑн сайтӗнче вырнаҫтарнӑ 5-мӗш класӑн расписанине пӑхсан вӗсем эрнере 3 сехет чӑваш чӗлхи, 5 сехет вырӑс чӗлхи вӗренеҫҫӗ.

#Раҫҫейре, #вӗренӳ, #50-мӗш шкул, #шкулсем, #Эхо Москвы, #вырӑс чӗлхи, #чӑваш чӗлхи, #Президент