Куславкка район халӑхӗ ҫӗртмен 4-мӗшӗнче Акатуя анлӑн уявларӗ.

Хальччен «Радуга» пионер лагерӗ пулнӑ уҫланкӑна чӑваш ялӗ картишӗсемпе, килӗ-ҫурчӗсемпе, ҫатан карти-мӗнӗпе куҫса килнӗ тейӗн. Ял халӑхӗ тата хула ҫыннисем, уява килнӗскерсем, пӗр-пӗрин патне хаваспах «хӑнана» ҫӳрерӗҫ. Кашни «килтех» вара сӗтел тулли ӗҫме-ҫиме.

Уява пухӑннӑ халӑха район ертӳҫисем саламланӑ хыҫҫӑн ҫур аки вӑхӑтӗнче чи хастар ӗҫленисене наградӑсемпе паха парнесем пачӗҫ.

Районта кӑҫал тыр-пула пурӗ 11 пин гектар ытла акнӑ. Ҫакӑн чухлӗ ҫӗре сухаласа акма машинӑпа трактор паркне ҫӗнетни май пачӗ. Юлашки виҫӗ ҫулта районта 250 миллион тенкӗлӗх ҫӗнӗ техника туяннӑ. Ытти ҫитӗнӳсем те сахал мар куславккасен. Ҫавӑнпа та мӗншӗн савӑнас мар-ха паянхи уявра?

Акатуй кашни ҫулах хавасланма, пӗр-пӗрне курса калаҫма кӑмӑл тӑвакансене пӗр ҫӗре пухать.Уява таврари ялсенче пурӑнакансем кӑна мар, ытти хуласенчен те килеҫҫӗ. Халӑх ӑстаҫисем те хӑйсен тӗрлӗ-тӗрлӗ таварне — килте тӗртнӗ кавирсене, хӑваран авса тунӑ сӗтел-пуканпа карҫинкка-сумккасене, килти хуҫалӑхра кирлӗ савӑт-сапана сӗнчӗҫ. Сутуҫӑсем тӗрлӗ ҫимӗҫ — кукӑль таврашӗнчен пуҫласа чӑвашсен кӑпӑклӑ сӑри таранах сутрӗҫ.

Уявӑн чи хаваслӑ саманчӗ те ҫитрӗ: районти мӗн пур ялтан илемлӗ пултарулӑх коллективӗсем килсе ҫитнӗ. Ҫакӑн чухлӗ халӑх капӑр тӑхӑнса, чӑваш тумӗсемпе килсе тулниех кирек камӑн кӑмӑлне те ҫӗклентерсе ярӗ. Концертра районти паллӑ артистсем, юрӑ-ташӑ ӑстисем хӑйсен пултарулӑхӗпе паллаштарчӗҫ.

Ҫав вӑхӑтрах спорт ӑмӑртӑвӗсем те иртрӗҫ. Кунта вара тӗп приза — такана — Г. Никитин йӗкӗт ҫӗнсе илчӗ.

#Акатуй, #Куславкка, #Куславкка районӗ