Мероприятире

Чӑваш Республикин тава тивӗҫлӗ культура ӗҫченӗ Илья Романович Степанов композитор хайӗн 70 ҫулхи юбилейне паллӑ турӗ. Уяв каҫӗ Кушкӑри кану ҫуртӗнче иртрӗ.

И.Р.Степанов ку таранччен пине яхӑн юрӑ кӗвӗленӗ, вӗсенчен 800 ытла юррине пичетлесе кӑларнӑ. Авторӑн «Шетмӗ кӗввисем», «Ай, юрлар-и», «Икӗ Илле юррисем», «Тӑванлӑх юррисем» тата ытти юрӑ кӗнекисене музыка енӗпе ӗҫлекен культура ӗҫченӗсем питӗ аван пӗлеҫҫӗ. Унӑн хисеплӗ те чыслӑ ячӗсем те автора ҫӳле ҫӗклеҫҫӗ. Вӑл — Чӑваш Республикинчи музыка обществин тава тивӗҫлӗ ӗҫченӗ, Чӑваш Республикинчи композиторсен ассоциацийӗн членӗ, Красноармейски районӗнчи Нестер Янкас ячӗллӗ литературӑпа искусство тата культура пӗрлӗхӗн преми лауреачӗ. Унӑн халӑхра анлӑ сарӑлнӑ «Шӑнкӑрав курӑкӗ», «Ҫул юхать», «Пурӑнатпӑр пӗрре ҫӗр ҫинче» юррисене пӗлмен ҫын та ҫук пулӗ.

Уяв программи Красноармейски районӗн Гимнӗпе (авторӗсем И.Р.Степанов тата Л.И.Антонов) уҫӑлчӗ. Хӑнасем юбиляр ҫинчен чылай ырӑ сӑмах каларӗҫ. Вӗсем пурте композитор кун-ҫулне тишкернӗ май Илья Степанов чӑваш юрӑ музыкин культурине аталантарас ӗҫре пысӑк тӳпе хывнине палӑртрӗҫ.

Уяв пысӑк концертпа вӗҫленчӗ. Унта «Трак ен» фольклор ушкӑнӗ, «Кӑмӑл» агитушкӑн, «Сударушки» ансамбль, «Шурӑмпуҫ» агитушкӑн, «Каприз» ансамбль, ветерансен хорӗ, Йӗпрем тата Кушка ялӗсенчи фольклор ушканӗсем хутшӑнчӗҫ.

Сӑнсем

#Красноармейски районӗ, #Йӗпрем, #Кушкӑ, #юбилейсем