Юлашки вӑхӑтра пирӗн культура шайӗ мӗнле пулни пӑшӑрхантарма пуҫларӗ. Йӗркесӗрлӗхпе темиҫе хут та тӗл пултӑм, ҫавӑнпа шухӑша кайрӑм.

Туй… Лайӑх-ха вӑл. Икӗ ҫамрӑк ҫемье ҫавӑрнинчен мӗн пахи пур? Ӗлӗк ку илемлӗ йӑла пулнӑ. Каччӑ хӗре укҫа парса илни, хӗр юрри, ҫӗнӗ ҫынна тепӗр кунне картлампа шыв йӑттарса, апат пӗҫерттерсе тӗрӗслени… Чӑннипех те хитре. Шел те, халӗ эпир ҫав йӑласене спектакльсенче ҫеҫ курма пултаратпӑр. Халӗ ҫӑмрӑксем туя кафере ирттереҫҫӗ. Пурнӑҫ малаллах каять, ун хыҫҫӑнах талпӑнмалла ҫав пирӗн. Анчах хӑш чухне кафере пухӑнни ытларах ӗҫкӗ-ҫике аса илтерет. Ара, унта эрехе сӗтел ҫине лартаҫҫӗ, мӗн чухлӗ хырӑма кӗрет – ҫавӑн чухлӗ ӗҫ. Пӗррехинче туйра пултӑм. Хӗрӗн ашшӗ-амӑшӗ самаях хӗрӗнкӗ пулнине ку таранчен курманччӗ те тӗлӗнтӗм. Яваплӑ кун ҫапла хӑтланма юрать-и вара? Юрать, хӗрне качча панӑшӑн чунтан савӑннӑ тейӗпӗр. Анчах урӑхла мелпе те савӑнма пулать-ҫке. Тӗслӗхрен, ура ыратиччен ташласа. Самай ӗҫрӗҫ ҫакскерсем. Юлашкинчен ашшӗ тӗп сӗтел ҫине ӳпӗнсе ҫывӑрса кайрӗ. Ҫынсем малалла савӑнчӗҫ. Хӗрӗ, кӗрӗвӗ юнашарах лараҫҫӗ. Питӗ хитре мар ӳкерчӗк ку.

Лавккана час-часах кӗме тивет. Ӗҫ юнашар пулнӑран куравпа суту-илӳ центрӗн ҫуртӗнче вырнаҫнӑ гипермаркета тӑтӑшах ҫӳретпӗр. Чӑннипе, юлашкинчен унта каяс кӑмӑл пачах пӗтрӗ. Сутуҫӑсем выҫӑ кашкӑртан та усалрах пек туйӑнаҫҫӗ. Паллах, лайӑххисем те пур. Шалу тӳлемеҫҫӗ-ши вӗсене е кунӗпе ӗҫлесе ывӑнаҫҫӗ-ши? Апла пулин те ку лавккана килнӗ ҫынсемпе хӑр-хар калаҫмалли сӑлтав мар. Кашнин хӑйӗн ӗҫне пӗлмелле. Сутуҫӑн кассӑра йӑл-йӑл кулмалла – кунта килекенӗн каялла таврӑнас килтӗр.

Культура шайӗ пирки пирӗн чӑнахах та шухӑшламалӑх пур. Пасара кӗр-ха. Ҫӗрӗк улма-ҫырла мар, лайӑхраххине суйласа пама ыйт-ха. Мӗнле кӑна сӑмах илтӗн пасар майрисенчен. Вӗсен ҫӗрӗккине сутсах пуяс килет-ҫке.

Тем тесен те, хамӑрӑн ҫул ҫинче ырӑ ҫынна ытларах тӗл пулас килет-ҫке. Вӗсем куна савӑк ирттермелӗх вӑй-хал хушаҫҫӗ.

#культура, #туйсем, #Шупашкар