Ишлĕ хули


(1220-мĕш çул)

Тахçантан вара ĕнтĕ сĕкĕнеç

Кай енчен килсе пăлхарсем çине.

Анчĕ караппа пилĕк вырăс кнеç,

Тухрĕ йăтăнса çӳл çыран хĕрне.

Инçе мар кунтан Ишлĕне çитме,

Инçе мар унтан таврăнас тесен.

Ишлĕ тавралла çӳллĕех чикме,

Шал енче хӳме икĕ хут иккен.

Ĕнтĕ мĕн тери юхрĕ хĕрлĕ юн —

Хăрамасть хула, парăнмасть пăлхар.

Ĕнтĕ ик енчен пĕтрĕ миçе чун?

Йывăр Ишлĕне — халăх йышлă мар.

Пуртăсем тытса чикмене хирме

Пычĕç вырăссем хай хула патне.

Чĕртнĕ вут йăтса хӳмене чĕртме

Çитрĕç те вĕсем тĕртрĕçĕ вутне.

Малтисем вутпа уçнă çулпала

Утпала килет хумлă-хумлă рет —

Керменпе хула йĕри-тавралла

Ухă-сăнăпа йышлă çар кĕрет.

Хӳмерен иртсен çӳллĕ ур та пур —

Ишрĕç тĕппипе темиçе тĕлтен.

Çапăçсассăн та темĕн пек сатур

Шав тивет чакма йăшнă ишлĕсен.

Ертӳçи вĕсен пĕчĕкçĕ йышпах

Ĕлкĕрчĕ тарма вут-хĕм витĕрех.

Парăнасшăн мар ыттисем çапах:

«Мăшкăл куриччен чунăм пĕттĕрех!»

Арăм, ачапча лекрĕ тыткăна,

Миçе чун тата çунчĕ çулăмра?!

Тăвăл евĕр вут хыпрĕ хулана —

Юлчĕ кăмрăк çеç сарлака уйра.

Пилĕк вырăс кнеç янă хурахсем

Тухрĕç Ишлĕне тустарса-тусса.

Илчĕç тыткăна сахал мар вĕсем,

Ĕлкĕрчĕç тухма пысăк мул пухса.

Ыткăнчĕç вара карапсем çине,

Кайрĕç хускалса тăвалла часрах.

Пăлхар ен хăпса тепĕр çыранне

Çитрĕ тăчĕ акă самантрах.

Çук пӳлсе хума ĕнтĕ вырăса —

Атăл варрине ухă çитес çук.

Юлчĕç пăлхарсем хыттăн макăрса,

Вырăс çарĕсем ишрĕç питĕ шух.

Мĕкĕрет кĕпçи, çухăрать сăрнай,

Ĕсĕклет-йĕрет тыткăнри этем...

Карапсем çинче пурлăх-мул нумай,

Савăнĕç пайтах вырăс кнеçĕсем.

Святославĕ ав каçăртнă пуçне:

«Атăлăн çулне илĕп хам алла,

Аçтăрхан патне çӳрĕп ун чухне...».

Сĕмсĕр Святослав, питĕ ан мухтан

Таврăнăп тесе ылтăн-кĕмĕлпе:

Карапу тулли ылтăн мар — ылхан,

Тулнă вăл йăлтах çын куççулĕпе.

Пĕтĕм таврана çилпеле вĕçсе

Кĕлĕ çак хулан кайĕ тетĕн-им?

Сан ятна-сумна ĕмĕр питлесе

Курăнĕ куçа Ишлĕ тĕтĕмĕ.

 

Ишлĕех хули ишĕлчĕ вутра,

Тыткăнри çынсем юлчĕç пуль ютра.

Тарнă ишлĕсем тĕнчере пĕтмен,

Тĕнчере пĕтмен, ячĕ те çĕтмен.

Вăрă-хурахсем хăртнă пуль хытах,

Ишлĕ ялĕсем шăтнă-мĕн татах.

Ункă еннелле пурăнать Ишлей,

Чăнлăпа Пăла еннелле, пĕлей,

Ишлĕ ялĕсем ӳснĕ йышланса,

Авалхи ята юлнă упраса.

 

Эй, чăваш, чăваш! Мĕн тери куççуль

Эсĕ çăтнă пуль, эсĕ тăкнă пуль.

Çиттĕрччĕ татах тӳсĕмлĕх сана

Упрама ятна, упрама йăхна.

Вулавçăсен шухăшĕ Вулавçăсен шухăшĕ


Ева (2010-04-09 19:31:14):

Ку сăвă çинчен тĕплĕнрех пĕлес килет.Чăнах пулнă-ши Ишлĕ?

Чĕлхе илемлĕхĕ: илемлĕ | Шухăшĕ: вăйлă | Содержанийĕ: тарăн

 

Admin (2010-04-10 00:31:49):

Ку сăвва «Хыпартан» илсе. Вăл çак статьяпа пĕрлеччĕ:

http://chuvash.org/e/d095d188c495d0bb20d0bcd0b0d1802c20d098d188d0bbc4952028d0932e20d0aed0bcd0b0d180d18229

 

Admin (2010-04-10 00:33:19):

http://bit.ly/cby1wI - ак çак каçăпа усă курăр

 

Agabazar (2013-04-30 22:02:18):

Хисеплĕ Ева, кунашкал хула чăнах та пулнă. Вăл вырăс хроникисенче (летопиçсенче) Ошель ятпа паллă. Унăн ишĕлчĕкĕсем хальхи вăхăтра Тутарстанри Теччĕ районĕнчи Пухтел (Богдашкино) ялĕ çывăхĕнче выртаççĕ пулмалла. Атăл кунтан пĕр 5-6 километрта.

Чĕлхе илемлĕхĕ: илемлĕ | Шухăшĕ: вăйлă | Содержанийĕ: тарăн

 

Agabazar (2013-04-30 22:06:54):

Летопиçсенчи Ошель ята хальхи Ишлĕ (Ишлей) ятпа çыхăнтараканни, сĕнекенни —çак сăвă авторĕ Геннадий Юмарт.

 

Agabazar (2013-05-06 19:23:49):

Ишлĕ (Ошель) хули пирки ак çакăнта вуласа пĕлме пулать: http://ru.wikipedia.org/wiki/Ошель

 

Agabazar (2013-05-08 19:56:25):

Çак сăвă авторĕ Геннадий Юмарт 75 çул тултарчĕ. Саламлар, çирĕп сывлăх, вăрăм кунçул сунар. http://chuvash.org/news/2751.html

 

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: