Петĕр Ялгирăн «Ман ялав — чăвашлăх» кĕнекинчен илнĕ.
    
    Чăвашсемшĕн тăрăшнă пекрех
    Вăл хăйне ялан кăтартнă.
    "Автономи тăвăпăр" тесех
    Хăть ăçта сăмах çаптарнă.
    
    Етĕрне чăвашĕ пулнăран
    Тăрăшнă хăй вирьялсемшĕн.
    Чĕмпĕре столица тăвасран
    Çав тери хăранă мĕскĕн.
    
    Савандеев — Анатсен асли —
    Элмене пит шиклентернĕ.
    Чĕмпĕре туман чăваш хули,
    Ленин сĕннине сивленĕ.
    
    Илнĕ кĕпĕрне хулисене:
    Пушкăрт Ĕпхĕве ал панă,
    Тутар тытнă Хусан элемне, —
    Уншăн савăнса ташланă.
    
    Пире лекнĕ уес хули çех.
    Эпĕр пит нумай çухатнă.
    Чăвашсен çурри куçкĕретех
    Пирĕнтен уйрăлса кайнă.
    
    Вырăса е тутара тухса
    Хăш чăваш пире шар кӳнĕ.
    Элмене хăть халĕ ылханса
    Лăплантăр-и чăваш чунĕ.