__Хӗрлӗ Чутай районӗнче__ Хӗллехи Олимп вӑййисене тата Ҫӗршыв хӳтӗллевҫисен кунне халалласа спорт ӑмӑртӑвӗсем иртрӗҫ. Ӑмӑртусенче предприятисемпе организацисем, ял тӑрӑхӗсен командисем, спорта юратакансем хутшӑнчӗҫ. Вӗсем пневматика пӑшалӗпе тӗл перессипе, тенниспа, дартс, кире пуканӗ йӑтассипе, ишессипе, шашкӑпа тата шахматпа выляссипе вӑй виҫрӗҫ, юлашкинчен волейбол вӑййи вылярӗҫ. Ӑмӑртусем командӑсем тата уйрӑм спортсменсем хушшинче иртрӗҫ.

Ҫӗнтерӳҫӗсем кашни вӑйӑрах нумайӑн, хӑшӗ-пӗрисене асӑнса хӑварар.

Ишессипе Ю.Пирогова (район пульници), А.Кучекеева (__Питӗркасси__ ял тӑрӑхӗ), Н.Шипеева (__Штанаш__ ял тӑрӑхӗ) малта пулчӗҫ. Арҫынсем хушшинче В.Михуткин (Питӗркасси ял тӑрӑхӗ), И.Сатлайкин (Штанаш ял тӑрӑхӗ) тата А.Сидоров(Хӗрлӗ Чутай райповӗ) ҫӗнтерчӗҫ.

Ушкӑнсем хушшинче малти вырӑнта __Питӗркасси ял тӑрӑхӗ__ пулчӗ, унтан Хӗрлӗ Чутай ял администраци спортсменӗсем вырнаҫрӗҫ. Пульница коллективӗн спортсменӗсем — 3 вырӑнта.

Дартс вӑййи выляссипе командӑсене илес пулсан, малтисем — район администраци чысне хӳтӗлекенсем, 2-мӗшсем — «Хастар» спорткомплекс ӗҫченӗсем, 3-мӗшсем — Хӗрлӗ Чутай ял тӑрӑхӗн спортсменӗсем. Кире пуканӗ йӑтассипе __Штанашри__ Зоя Прокопьевӑна ҫитекенни пулмарӗ, вӑл кире пуканне 94 хутчен ҫӗклеме пултарчӗ! 2-мӗш вырӑнта В.Ярабаева (администрацинчен), 3-мӗш Н.Шипеева (Штанаш ял тӑрӑхӗ). Арҫынсенчен ылтӑн медале В.Герасимов («Хастар») тивӗҫрӗ, кӗмӗле — В.Афанасьев (Тралькассинчен), пӑхӑра — А.Воробьев (Хусанушкӑньтен). Командӑсем хушшинче штанашсем малти вырӑна тухрӗҫ, иккӗмӗшсем — «Хастар» хастарӗсем, виҫҫӗмӗшсем — администраци ушкӑнӗ. Штанашсем ҫавӑн пекех шахматла выляссипе (Ю. Пахинов) тата пневматика пистолечӗпе перессипе (А. Кузьмин) малти вырӑнсене йышӑнчӗҫ.

Кашни вӑйӑ хастар иртрӗ, хутшӑнакансене савӑнӑҫ парнелерӗ!

__http://gov.cap.ru/info.aspx?gov_id=69&type=main&id=2717310|**Сӑнсем**__ (100)