Пуҫлӑх патне каякан кирек епле ҫын та пулӑшу кӗтсе илессе шанать. Район шайӗнчи пуҫлӑхсем патнех те халӑх чун ыратӑвӗпе ҫитет. __Шупашкар район__ администрацийӗн пуҫлӑхӗ Георгий Егоров ҫак эрнере ирттернӗ йышӑнӑва вунӑ ҫын пынӑ. Вӗсем — __Кӳкеҫ__, __Ишлей__, __Шӗнерпуҫ__ тата __Лапсар__ ял тӑрӑхӗсенче пурӑнакансем.

Кама мӗн пӑшӑрхантарать-ха? Халӑхӑн ыйтӑвӗ, пӗтӗмӗшле илсен, пӗр пекрех. Сӑмахран, нумай ачаллӑ ҫемьесем валли ҫӗр уйӑрса парасси, ҫӗнӗ урамсене шыв тата ҫутӑ кӗртесси. __Ишлей ял тӑрӑхӗнче__ пурӑнакан пӗр хӗрарӑм та, ав, ҫӗр ыйтӑвнех хускатнӑ. Нумай ачаллисем вӑл тӑрӑхра 31 ҫемье ҫак ӗмӗтпе ҫунатланать иккен. Паянхи куна илсен вуннӑшне кӑна тивӗҫнӗ-мӗн. Район администрацийӗн пуҫлӑхӗ ҫакӑншӑн Ишлей ял тӑрӑхӗн пуҫлӑхне ӳпкелесе илнӗ. Вырӑнта ҫине тӑманнине пула юлашки икӗ ҫул хушшинче ҫӗр участокӗсене виҫтермен иккен. Анчах ку ыйтӑва хӑй еккипе ямӗҫ — яваплисене ӗҫе хӑвӑртлатма хушнӑ.

Ҫӗр ҫинче тӗрлӗрен кӗнчеле теҫҫӗ те, __Шӗнерпуҫ ял тӑрӑхне__ кӗрекен __Хыркасси__ ялӗнче пурӑнакан пӗр хӗрарӑм тата урама машинӑсем кӗртес мар тесе пӗренесем хурса тухнӑ иккен. Шучӗпе вӑл урама ҫӑртарасшӑн мар пулӗ те, анчах апла тума юраманнине кура Георгий Егоров пуҫлӑх районти администраци комиссийӗн ячӗпе заявлени ҫырма сӗннӗ.

Асӑннӑ районӑн официаллӑ сайтӗнче пӗлтернӗ тӑрӑх, йышӑнура хускатнӑ мӗнпур ыйтӑва епле татнине райадминистраци пуҫлӑхӗ хӑй тӗрӗслесе тӑмалла.