Наци кросӗ __Патӑрьел районӗнчи__ __Сӑкӑт__ ялӗнче спорта юракансен уявӗ пулса тӑчӗ. Кашни ҫулах пысӑк хавхаланупа иртет вӑл. Ҫак хаваслӑ уява хутшӑнма чӑн-чӑн спортсменсене ҫанталӑк сӳрӗклӗхӗ чӑрмантараймасть. Акӑ, хальхинче те, ҫумарлӑ ҫанталака пахмасӑр, старта ҫӗр ытла ҫын тӑчӗ.

Чи малтанах физкультурӑпа спорта юратакансене, сывӑ пурнӑҫ йӗркине тытса пыракансене __Сӑкӑт ял тӑрӑхӗн__ пуҫлӑхӗ Сергей Толстов уяв ячӗпе ӑшшӑн саламларӗ. Ун хыҫҫӑн Сӑкӑт шкулӗн ертӳҫи Анатолий Падусев сӑмах илчӗ. Сӑкӑт шкулӗн физкультура учителӗ Владислав Анюров чи малтан ялти «Ҫӑлкуҫ» ача пахчин ӗҫченӗсене, унта ҫӳрекен пӗчӗк шӑпӑрлансене старта тӑратрӗ. Ун хыҫҫӑн Сӑкӑт шкулӗнче вӗренекенсем — малтан кӗҫӗн классем, кайран вӑтам тата аслӑ классем — тӗрлӗ дистанцисене пӗр-пӗринпе ӑмӑртса чупрӗҫ.

Спорт уявӗнче «Чи ҫамрӑк спортсмен» ята ача пахчине ҫӳрекен А.Ёлкин ҫӗнсе илчӗ. А.Правитель, В. Шапкин, В.Кариков тата Л.Чернова, В.Чумакова, М.Анюрова кӗҫӗн классенче вӗренекенсем те чи маттуррисем пулчӗҫ кросра. Кӗске ҫаврӑма ачасем пурте хӑвӑрт чупса тухрӗҫ. Жюри никамӑн кӑмӑлне те хӑварас темерӗ — кашнинех мухтав хучӗпе чысларӗ. Д.Хмелёв, А.Сандыркин, А.Кузнецов тата В.Чернова, А.Кузнецова, М.Анюрова вӑтам классенче вӗренекенсем кросра чӑн-чан маҫтӑрсем пулни палӑрчӗ. Ӑмӑртусене хутшӑнакансен ҫулӗсем ӳссе пынӑ май, дистанци те вӑрӑмланчӗ. В.Лукьянов, Б.Юсупов, Ю.Тинюков тата Г.Прокопьева 8–9 классен спортсменӗсем старта чи малтан ҫитрӗҫ. Аслӑ классем хушшинче вара Е.Анюров, А.Анюров, А.Кушников шкул чемпионӗсем Ҫӗнтерӳҫӗ дипломне илме тивӗҫлӗ пулчӗҫ.

Наци кросӗ-2013 Сӑкӑтра тивӗҫлӗ шайра иртрӗ.