__Мӑн Шетмӗ__ тӑрӑхӗнчен паллӑ ҫынсем сахал мар тухнӑ. Ҫав йышра литературӑпа ӳнерте палӑрнисем те. Вӗсен шутне __Четрикре__ ҫуралса ӳснӗ __Николай Петрович Петрова__ кӗртетпӗр. Вӑл учитель пулнӑ — шкулсенче ачасене вӗрентнӗ, директорта ӗҫленӗ. Ҫав хушӑрах поэзи пахчинче ырми-канми вӑй хунӑ. Ӑна эпир чӑннипех те поэт-публицист е гражданла лирика сӑвӑҫи тетпӗр.

__Мӑн Шетмӗри__ вӑтам шкулта Николай Петрова асӑнса литература каҫӗ иртрӗ. Ку икӗ пулӑмпа сӑлтавланнӑ: ҫӑвӑн 19-мӗшӗнче учитель-сӑвӑҫ ҫуралнӑранпа 60 ҫул тултарчӗ тата ҫӗртмен 23-мӗшӗнче вӑл пирӗнтен уйрӑлса кайнӑранпа виҫӗ ҫул ҫитет. Питӗ шел, мал ӗмӗтлӗ ҫынӑн кун-ҫулӗ кӗске килчӗ, хӑйӗн сумлӑ юбилейне паллӑ тӑваймарӗ.

Тӗлпулӑва шкул директорӗпе А.И. Васильевпа С.М. Назарова вӗрентекен ертсе пычӗҫ, унта шкулти 5, 7, 8-мӗш классенче вӗренекенсем пухӑнчӗҫ. Районти Н. Янкас ячӗллӗ литературӑпа ӳнер тата культура пӗрлӗхӗн правлени пайташӗсем пиллӗкӗн килнӗ. __Красноармейскинчи__ вӑтам шкулти чӑваш чӗлхипе литературине вӗрентекен В. Михайловпа районти тӗп вулавӑш ӗҫченӗ С. Гурьева Н. Петровӑн ӗҫӗпе пултарулӑхӗ пирки тӗплӗн каласа пачӗҫ, электронлӑ хӑтлавсене кӑтартрӗҫ, сӑввисене вуларӗҫ. Вячеслав Сергеев, Алла Яковлева тата Елизавета Петрова вӗренекенсем поэтӑн ачасем валли ҫырнӑ сӑввисене пӑхмасӑр каларӗҫ.

Хӑйсен юратнӑ пиччӗшӗ ҫинчен унӑн шӑллӗ Василий Петров тата йӑмӑкӗ Надежда Марчук ӑшшӑн аса илчӗҫ. Ҫавӑн пекех Николай Петровӑн тус-юлташӗсем — Н. Янкас пӗрлӗхӗн правлени председателӗ __Г. Ефимов-Тусли__, унӑн ҫумӗ __Н. Ершов-Янгер__ тата таврапӗлӳҫӗсен районти уйрӑмӗн ертӳҫи В. Константинов-Улӑхсем ҫыравҫӑсем ӑшпиллӗ сӑмахсем каларӗҫ. Ял ҫыннисен ячӗпе кунти ветерансен ертӳҫи И. Ильин тухса калаҫрӗ.

Ҫак тӗлпулу асра юлтӑр тесе, В. Константиновпа Н. Ершов хӑйсен кӗнекисене Н. Петровӑн ҫывӑх тӑванӗсене парнелерӗҫ. Тӗлпулура поэтӑн тата ӑна халалланӑ сӑвӑсем янӑрарӗҫ. Вӑхӑтсӑр ҫӗре кӗнӗ поэтӑн килӗнче упранма Н. Янкас ячӗллӗ преми лауреачӗн паллине парса хӑварчӗҫ. Поэт тӑванӗсем хӑйсен пиччӗшне ҫапла чысланӑшӑн тав турӗҫ.

Сывпуллашас умӗн Н. Петровӑн тӑванӗсем тата пынӑ хӑнасем унӑн Мӑн Шетмӗри вилтӑпри ҫине чӗрӗ чечексем хучӗҫ, асӑну сӑмахӗсем каларӗҫ.