Чӳкӗн 23-мӗшӗнче ЧПУн чӑваш филологийӗпе культура факультетӗнче хӑнана Эктор Алос и Фонт тата Александр Васильевич Блинов чӗлхеҫӗсем ҫитрӗҫ. Пӗрремӗш курс студенчӗсем хаклӑ хӑнасене хаваспах кӗтсе илчӗҫ.

Эктор Алос и Фонт Франци ҫӗршывӗнчи Каталони тӑрӑхӗнче ҫуралса ӳснӗ, унӑн тӑван чӗлхи каталон чӗлхи, халӗ вӑл тӑрӑшсах чӑвашла вӗренет. Александр Блинов вара __Шупашкартах__ ҫуралса ӳснӗ, анчах пӗчӗкле вырӑсла ҫеҫ пӗлнӗ, халӗ вара чӑвашла та шакӑртаттарсах калаҫать.

Эктор тӗнчери пӗчӗк йыш калаҫакан чӗлхесен шӑпи пирки мӗн тӗпчесе пӗлни пирки каласа пачӗ. Вӑл палӑртнӑ тӑрӑх, каталон чӗлхине те ЮНЕСКО пӗтекен чӗлхесен шутне кӗртнӗ, ҫавӑнпа тӗпчевҫӗ тӑван чӗлхин шӑпи пирки кулянать, ӑна мӗнле ҫӑлса хӑварасси пирки шухӑшлать. Ун шучӗпе __чӑваш чӗлхин__ пуласлӑхӗ каталони чӗлхиннинчен аванрах, мӗншӗн тесен чӑваш чӗлхипе калаҫакансен йышӗ пилӗк хут ытларах. Чӗлхесен пуласлӑхӗ ҫамрӑксенчен килнине палӑртрӗ тӗпчевҫӗ. Тӗслӗх вырӑнне Александр Блинова илме пулать. Вӑл, чӑваш йӑхӗнчен тухнӑскер, малтан чӑвашла пӗлмен, анчах ҫакӑ йӗркеллӗ маррине ӑнланса илсе хӑй тӗллӗнех ашшӗ-амӑшӗн чӗлхине вӗреннӗ. Ку ҫеҫ те мар-ха, чӑваш наци ыйтӑвӗпе кӑсӑкланакансене пӗрлештерекен «Хавал» ушкӑн йӗркеленӗ. Ҫак ушкӑна кӗрекенсем пӗрле пухӑнса тӗрлӗ ыйтусене татса параҫҫӗ. Тӗслӗхрен, Шупашкарти 10-мӗш шкулта пур предмета та чӑвашла вӗрентекен программӑпа пуҫламӑш классенчи ачасене вӗрентме тытӑннӑ. Хальлӗхе ачасем 2-мӗш класс таран вӗренсе ҫитнӗ. Ҫавӑн пекех тӗрлӗ сайтсене чӑвашла куҫарма палӑртнӑ.

Паллах, ҫакӑн пек ыйтусене татса панӑ чухне чӑвашла лайӑх пӗлекен, ҫыракан, шухӑшлакан ҫамрӑксем ҫитмеҫҫӗ. Ҫавӑнпа та чӑваш филологийӗпе культура факультетне тӗлпулӑва килнӗ хӑнасем яшсемпе хӗрсенчен пулӑшу ыйтрӗҫ. Ҫамрӑксем вара чӗлхемӗр пуласлӑхӗшӗн тӑрӑшма яланах хатӗрри пирки пӗлтерчӗҫ.