Мухтавлӑ ентешӗмӗр, паллӑ юрӑҫ, Чӑваш АССР халӑх, РСФСР тава тивӗҫлӗ Чӑваш патшалӑх премийӗн лауреачӗ, Тӑван ҫӗршывӑн вунҫичӗ наградин кавалерӗ __Мефодий Иванович Денисов__ юрӑҫ ҫуралнӑранпа 90 ҫул ҫитнине халалласа __Кивĕ Чукалти|Кивӗ Чукалти__ пӗтӗмӗшле пӗлӳ паракан тӗп шкулта асӑну мероприятийӗ пулса иртрӗ. Сӑмах май, вӑл шӑпах ҫак ялти шкулта 1936 ҫулта ҫичӗ класс вӗренсе пӗтернӗ.

Ирпе, уроксем пуҫланичченех, вӗренекенсемпе вӗрентекенсем юрӑҫ хӑй сывӑ чухнех шкула парнеленӗ кассетӑсенчи юрӑсене итлерӗҫ. Тӑхтав вӑхӑтӗсенче ачасем шкулти историпе таврапӗлӳ музейӗнче пулчӗҫ. Ҫак музейра М. Денисов кӗтесӗ пур. Унта сцена ӑсти усӑ курнӑ тумтир, кӗнекесем, ун ҫинчен ҫырнӑ хаҫат-журнал, алҫырӑвӗсем, ытти хаклӑ документсемпе сӑнӳкерчӗксем упранаҫҫӗ. Шкулти ҫамрӑк таврапӗлӳҫӗсем юрӑҫа халалласа стенд йӗркеленӗ, унта ентешӗн пурнӑҫне аван ҫутатса панӑ. Стендпа юнашарах М.Денисовӑн ӑру йывӑҫҫине вырнаҫтарнӑ. Музейри калаҫӑва Анжелина Малеева таврапӗлӳҫӗ ертсе пычӗ.

Уроксем вӗҫленсен ҫамрӑк артистсем акт залӗнче концерт лартса пачӗҫ. Концерта ҫак шкулта музыка предметне вӗрентекен Татьяна Михайловна Малеевӑпа Галина Владимировна Карзанова вожатӑй ертсе пынипе хатӗрленӗ. Концерт вӑхӑтӗнче куракансем «Мефодий Иванович Денисовӑн асаилӗвӗсем» проектпа паллашрӗҫ. Проекта шкул вулавӑшӗнче ӗҫлекен Зоя Ивановна Кувайскаяпа Татьяна Михайловна Малеева хатӗрленӗ.

Юлашкинчен М.Денисов ҫуралнӑ ҫурт вырӑнӗнчи Асӑну хӑми умне чӗрӗ чечексем хутӑмӑр. Ҫак чечексене ятарласа шкулти социаллӑ педагог Ирина Малеева ӳстернӗ. Чечексене кайса хума Елена Малеева, Мария Чамеева, Михаил Кириллов ҫамрӑк юрӑҫсем тивӗҫлӗ пулчӗҫ.