Паян, ака уйӑхӗн 24-мӗшӗнче, Шупашкарта пурӑнакан Николай Пискун вӑрҫӑ ветеранӗ 100 ҫул тултарнӑ. Вӑл Украинӑри Житомир облаҫӗнчи Городковка ялӗнче ҫуралнӑ. Юбилей ячӗпе ӑна тӗрлӗ ҫӗрте тӑрӑшакан тӳре-шара саламлама пынӑ.
Николай Пискуна 19 ҫула ҫитсен ҫара илнӗ. Малтан Николай Иванович пулемётчиксемпе минометчиксене хатӗрлекен училищӗре вӗренет. Анчах вӗренсе пӗтеричченех ӑна фронта янӑ. Курск пӗкки патӗнчи ҫапӑҫса хатӗрленнӗ май вӗсен ушкӑнӗ ҫапӑҫса разведкӑна кӗрсе каять. Унта вӑл урине амантать. Госпитальте виҫӗ уйӑх выртса тухнӑ хыҫҫӑн вӑл салтаксене фронта хатӗрлекен пулса тӑрӑшать. Ҫар службинче 1970 ҫулчченех пулнӑ.
Кайран, Шупашкара куҫса килсен, кунти промышленность тракторӗсен заводӗнче ӗҫленӗ.
Арҫыннӑн арӑмӗ вилнӗ, ывӑлӗ те леш тӗнче уйрӑлса кайнӑ. Паян ӑна арӑмӗн ывӑлӗ пӑхса тӑрать.
Ингушетире Тӑван ҫӗршывӑн Аслӑ вӑрҫине Канашран ӑсатнӑ салтакӑн, паянхи кунчченех хыпарсӑр ҫухалнисен шутӗнче пулнӑскерӗн, юлашкисене тупнӑ.
Шырав ушкӑнӗн хастарӗсем халӗ ҫав салтакӑн, Константин Зотовӑн, тӑванӗсемпе тӑхӑмӗсене шыраҫҫӗ. Канашри ҫар комиссариачӗ Чӑваш Ене ҫитнӗ информацие тӗрӗсленӗ те ӗнтӗ. Константин Андреевич 1915 ҫулта ҫуралнӑ, 1942 ҫулхи чӳк уйӑхӗнче хыпарсӑр ҫухалнӑ. Ӑна Канашран Житомир хулине 1670-мӗш ушкӑн йышӗпе пӗрле ӑсатнӑ. Мӑшӑрӗ Людмила Хорькова Шупашкарти Карл Маркс урамӗнче пурӑннӑ.
Унсӑр пуҫне паттӑр салтак пилот пулни, «Ил-2» самолетпа вӗҫни паллӑ. Шырав отрячӗн хастарӗсем тӑванӗсем кӑмӑл тусан салтакӑн юлашкисене тӑван тӑрӑхне илсе килсе пытармашкӑн пулӑшма хирӗҫ мар.
+12.3 °C