ШӖМ тунӑ сӑн

Шупашкарта пурӑнакан кинемее палламан ҫынсем ҫине-ҫинех улталанӑ. Вӑл вара вӗсене кашнинчех ӗненнӗ. Лешсем унран 1,5 миллион ытла тенкӗ сӑптӑрса илсен те хӑпман - шӑнкӑравласах тӑнӑ. Кинемей патне полицейскисем киле пырса ултавҫӑсем пирки ӑнлантарнӑ.

Пӗлтӗр кинемей инвестицисемпе ӗҫлесе илес тесе 150 пин куҫарса панӑ. Иккӗмӗш хутӗнче ун патне «банк ӗҫченӗ» шӑнкӑравланӑ, «хӑрушсӑр счет» ҫине 630 пин тенкӗ куҫарма ӳкӗте кӗртнӗ. Виҫӗ уйӑх каялла кинемее палламан ҫын 800 пин тенкине инвестицие хывма ӳкӗте кӗртнӗ. Ҫав укҫан пӗр пайне вӑл пӗлӗшӗнчен кивҫен илнӗ, тепӗр пайӗ - кредит.

Ултавҫӑсем ун патне шӑнкӑравлама пӑрахман. Хальхинче ӑна 1,5 милион тенкине тавӑрма тесе 100 пин тенкӗ ыйтнӑ.

Инкеклӗ лару-тӑру министерстви тунӑ сӑн

Паян ирхине Шупашкарти «Промлит» савутра пушар пулнӑ. Ҫӑлавҫӑсем патне ку хыпар 7 сехет те 2 минутра ҫитнӗ. Вӗсем ҫитнӗ тӗле цехра ҫӑра тӗтӗм сарӑлнӑ.

Савутран 75 ҫын хӑйсем тӗллӗнех эвакуациленнӗ. 8 сехет те 59 минутра ҫӑлавҫӑсем пушара сӳнтернӗ. Ҫулӑм 200 тӑваткал метр лаптӑк ҫинче алхаснине палӑртнӑ. Юрать-ха, вилнисем, аманнисем пулман.

Пушар мӗнрен тухнине палӑртма ятарлӑ экспертиза ирттереҫҫӗ.

"Контактри" сӑн

Елчӗк муниципаллӑ округӗнчи ҫамрӑк спортсмен ҫитӗнӗвӗсемпе савӑнтарнӑ. Михаил Миллин ирӗклӗ кӗрешӳ енӗпе иртнӗ Пӗтӗм Раҫҫейри турнирта икӗ медаль тата чемпион пиҫиххине ҫӗнсе илнӗ.

Михаил икӗ виҫе категорийӗнче тупӑшнӑ. 26 килограмм тайманнисен категорийӗнче вӑл финала тухнӑ, кӗмӗл медаль ҫӗнсе илнӗ. 29 килограмм таякансен хушшинче те Михаил финала тухнӑ, унта пурне те ҫӗнсе ылтӑн медале тивӗҫнӗ. Ӑна чемпион пиҫиххипе те чысланӑ.

Тегеграмри "Чӑваш Ен калаҫать" каналтан илнӗ сӑнӳкерчӗк

Шупашкарта пурӑнакан темиҫе тӑлӑх тинех хваттерлӗ пулнӑ.

Вӗсем пурӑнмалли кӗтеслӗ пулассине 10 ҫула яхӑн кӗтнӗ.

Телеграмри «Чӑваш Ен калаҫать» каналта пӗлтернӗ, «тинех ӗнтӗ хваттер уҫҫисем пӗрин хыҫҫӑн тепри хӑйсен хуҫисене тупнӑ. 40 ҫын ӗмӗчӗ пурнӑҫланнӑ. Тӑлӑха тӑрса юлнӑскерсемшӗн Шупашкарти Геннадий Айхи проспектӗнчи 28-мӗш ҫурт тӑван кил пулса тӑнӑ».

Чӑваш Енри тӑлӑх ачасене хваттерпе тивӗҫтерес ӗҫ малалла пырать. Черетре тӑракансене кӑҫал 414 хваттер парӗҫ. Вӗсенчен 171-шне – Шупашкарта.

Янӑш шкулӗн сӑнӳкерчӗкӗ

Шупашкар муниципалллӑ округӗнчи М. В. Игнатьев ячӗллӗ Янӑшри вӑтам шкулта Чӑваш чӗлхи кунне халалласа «Унӑн ячӗ нихӑҫан та сӳнмӗ» уяв иртнӗ. Аслӑ вӗрентекенӗмӗре, И.Я.Яковлева, халалласа литературӑпа музыка композицийӗ йӗркеленӗ.

«Уявра чӑваш чӗлхи ирӗккӗн те мӑнаҫлӑн янӑрарӗ», — хыпарланӑ вырӑнти шкулта чӑваш чӗлхи вӗрентекен Наталия Магазеева.

Чӑваш чӗлхи уявне хӑнасем те килсе ҫитнӗ. Вӗсен шутӗнче – Янӑш территори округӗн пуҫлӑхӗ Иван Грачёв, Шупашкар округӗнчи Хӗрарӑмсен ушкӑнӗн пуҫлӑхӗ  Наталия Ердукова, Чӑваш Республикин хисеплӗ таврапӗлӳҫи Геннадий Васильев.  Геннадий Леонидович чӑваш халӑхне ҫутта кӑларакан хисеплӗ ҫыннӑмӑрӑн кун-ҫулӗпе пархатарлӑ ӗҫӗ-хӗлӗ ҫинчен тӗплӗн  каласа кӑтартнӑ.

5-11 класра вӗренкенсем вара И.Я.Яковлев пурнӑҫӗпе пултарулӑхне сцена ҫинче выляса панӑ.

vk.com/wall-194537172_14200 страницӑран илнӗ сӑнӳкерчӗк

Ҫу уйӑхӗнчи уявсен тӗлӗнче Шупашкара Раҫҫей чемпионки Аделия Петросян килнӗ.

Хӗр Этери Тутберидзе командин турне хутшӑннӑ май пирӗн республикӑна килсе ҫитнӗ. Шоуна хутшӑнма килнӗскер хулапа паллашнӑ, кунти паллӑ вырӑнсемпе киленннӗ.

Хӑйӗн кӑмӑл-туйӑмӗпе фигуристка халӑх тетелӗнчи хӑйӗн страницинче паллаштарнӑ: «Шупашкар – хӑтлӑ та стильлӗ хула. Кунта урамсене тӗрлӗ вак-тӗвек илемлетет».

t.me/chuv_kray каналтан сӑнӳкерчӗк

Сӗнтӗрвӑрринчи Нина Конова ҫамрӑк мар пулин те ахаль ларма юратмасть – вӑл вӑхӑта ал ӗҫӗпе иртерет.

Нина Конова паспортпа – 99 ҫулта. Анчах хӑй ӗнентернӗ тӑрӑх, вӑл 100 ҫулта. Документ валли ҫула каланӑ чухне вӑл хӗр-тусӗ пек пулас тесе 1925 ҫулхи тесе персе янӑ.

Кинемей кивӗ япалара пӗчӗк кавир ҫыхать. «Ӗҫленӗ чухне иртнине аса илсе ларатӑп», – тет вӑл.

"Контактри" сӑн

Муркаш муниципаллӑ округӗнчи Оринин ялӗнче пурӑнакан Зина Саввова ал ӗҫӗпе питӗ аппаланма юратать. Унӑн килӗнче ҫыхнӑ япала нумай: минтерсем, чечексем, вырӑн ҫиттисем...

Вӑл - тыл ӗҫченӗ тата ӗҫ ветеранӗ. Малтан упӑшкипе колхозра вӑй хунӑ, кайран Туберкулезпа кӗрешекен диспансерта темиҫе ҫул санитарка пулнӑ. Тивӗҫлӗ канӑва тухсан Зина Саввова хӑйӗн юратнӑ алӑ ӗҫӗпе аппаланма тытӑннӑ. Ҫыхасси - унӑн чун киленӗҫе. Хӑй каланӑ тӑрӑх, вӑл унӑн кӑмӑлне ҫӗклет.

Халӗ Зина Саввова ачисемпе, мӑнукӗсемпе, вӗсен ачисемпе савӑнса пурӑнать.

cap.ru сӑнӳкерчӗкӗ

Ҫу уйӑхӗн 8-мӗшӗнче Шупашкарта Хӗрлӗ тӳремре «Ясна кӗвӗ» этнофестивалӗн гала-концерчӗ пулӗ. Унта чӗрӗ юрӑ-кӗвӗ янӑрӗ.

Этнофестивале фольклор юрри-кӗввине хальхи аранжировкӑпа халӑх инструменчӗсемпе усӑ курса юрлакансем хутшӑнаҫҫӗ. Фестивале малтан «Ясна» этнокомплексра хатӗрленнӗ, унтах ӑсталӑх класӗсем, лекцисем, тӗлпулусем иртнӗ.

Гала-концертра конкурсӑн 3 ҫӗнтерӳҫине палӑртӗҫ, кашнин валли видеоклип ӳкерӗҫ. Ку вӗсене хӑйсен юрри-кӗввине малалла аталантарма пулӑшӗ.

Палӑртмаллӑ: ҫак фестиваль иккӗмӗш ҫул иртет. Концерта тӳлевсӗрех кӗртеҫҫӗ.

cap.ru сӑнӳкерчӗкӗ

ЧР Элтеперӗ Олег Николаев Тӑван ҫӗршывӑн Аслӑ вӑрҫин ветеранӗпе Александр Корниловпа тӗл пулнӑ, сӗтел хушшинче пӗрле чей ӗҫнӗ.

97 ҫулти ветеран Шупашкарта пурӑнать. Олег Алексеевич ӑна ҫывхарса килекен Ҫӗнтерӳ кунӗ ячӗпе саламланӑ, ӑшӑ жилет парнеленӗ. Вӗсем сӗтел хушшинче республикӑри, ҫӗршыври лару-тӑрӑва сӳтсе явнӑ.

Палӑртмалла: Александр Егорович вӑрҫӑра минометчик пулнӑ, Хӗвеланӑҫ Украинӑра банформированипе кӗрешнӗ. Ветеран каланӑ тӑрӑх, вӑл бандеровецсем ҫынсене хӑратса ҫуртсене ҫунтарнине паянхи кун пек астӑвать.