Чăваш чĕлхи
хитре пулни
никама та
тĕлĕнтермест.
Чĕлхе пуянлăхĕ
тулни,
хамăр сывă
чух пĕтмест.
– Пирĕн пата
эс кĕрсе тух –
ун пек йыхрав
мĕнле аван.
Çапла кама та
чĕннĕ чух –
эс те
тĕлĕнсе каян.
Сана чĕнеççĕ
«кĕр» тесе,
çав вăхăтрах
«тух» та пур.
Эс ан шутла
ку шӳт тесе –
ун пеккисем
татах та пур.
«Килсе кай»
тесе чĕнсен,
нимте
тĕлĕнмелле мар.
Анчах чăнах та эс
килсен –
тухса каичченех
лар.
Ун пек
сăмахсем нумай,
чăвашла
калаçнă май.
Çак сăмахсем
пултараç,
ăнлантараç,
култараç.
Иккĕллĕ çак
ăнлану –
чăваш ăшне
кăтартать.
Пĕр енчен вăл
пăлхану,
тата шӳт те
палăртать.
Эп юратса
пăрахрăм
(теççĕ пирĕн
хушăра).
Иртерех пуль,
хăратрăм
хамăн пулас
мăшăра.
Тепĕр енчен
шутласан
«пăрахрăм»
тесе каласан –
вăхăт çитсен
уйрăлма,
кирлĕ те мар
калама.
Чăваш чĕлхи
шӳтлесе
пурнăçа
çемçелетет.
«Кăлтăксем
пур-ши тесе,
ан намăсла
мана» – тет.