Шурă-шурă çеçке çурнă
Çамрăк çĕмĕрт пахчара.
— Пире мар эс, çĕмĕрт, курнă,
Курнă урăх мăшăра.
Шăпчăксен юрри илемлĕ
Шурăмпуçĕ килеспе.
Эпĕ мар ăна итленĕ
Ирсерен чун савнинпе.
Каччине хĕр парнеленĕ
Асăнмалăх шур кĕпе.
Эпĕ мар ăна çĕленĕ,
Капăрлатнă тĕрĕпе.
Манăн мар, вăл урăх хĕрĕн
Çулăмланнă чун-чĕри,
Чуптусан тутийĕ хĕрнĕ
Шĕл кăвар пекех вĕри.
...Çĕнĕ юр пек шурă çĕмĕрт,
Тек пытармăн никамран,
Юратмашкăн ĕмĕр-ĕмĕр
Тупа турăмăр паян.