Пире тахçан яланлăхах хăратнă;
Нумай пăхтарнă вилĕм куçĕнчен.
Тен, çавăнпа эпир ытла та шăппăн,
Асăрханса пурнатпăр çĕр çинче?..
Вилме пултарнă, пурпĕр чĕрĕ юлнă...
Малах васканă, вилĕме çĕнсе...
Эпир, чăнах та, — вăйлă, аслă халăх!..
Анчах — ытла йăваш, сăпай çынсем.
Тăван çĕршывшăн пурнăçа паратпăр,
Пĕр тăхтаса тăмасăр, хаваспах.
Ĕçленĕ чух эпир канма пĕлместпĕр.
Тен, халĕ те пĕтместпĕр çавăнпах?..
Эпир, чăнах та, — вăйлă, аслă халăх,
Анчах — ытла йăваш, сăпай çынсем.
Çук, эпирех пурнатпăр питĕ тĕрĕс:
Малах васкатпăр, вилĕме çĕнсе!