Эпир санпа телейлĕ мăшăр —
Венчет çĕрри алăсенче.
Яланлăха упранса тăтăр
Чĕресенче çурхи тĕнче.
Венчет çĕрри — çемье тĕвви,
Мăшăрлă пурнăçăн тĕрри,
Ăнăçлă ĕмĕрĕн кĕвви,
Турă парни — венчет çĕрри.
Кĕмĕл те ылтăн… туй кĕрлетĕр, —
Шăпамăрсем пӳрнĕ пулсан
Венчет çĕрри ан тĕксĕмлентĕр
Йывăрлăхсем айне юлса.
Иккĕн пĕр сывлăшпа сывлатпăр, —
Эпир — пĕр тĕвĕ, пĕр çеçке…
Телейлĕн юратса утатпăр,
Сукмак ан пултăрччĕ кĕске.