Тӳперен сар тенкĕсем ӳкеççĕ.
Кĕр çилне эп лартрăм юнашар.
Алă сулчĕ тусăмсен Кӳкеçĕ.
Ман умра шап-шурă Шупашкар.
Тунсăха туйса илен кĕç эсĕ:
Кайăк тĕкĕ ӳкрĕ шыв çине.
Атăл урлă акăшсем вĕçеççĕ,
Хăвалаççĕ иртнĕ çу кунне.
Кăнтăра çити хăюллăн вĕçчĕр.
Хыçалтан пĕччен пăхса тăрса,
Сĕмсĕр хуйхă, кĕвĕçӳ е вĕчĕ
Ан хăварччăр чĕрене хăртса.
Куçăмра çунмасть текех çут ĕнчĕ.
Эп тытатăп вăхăт шухăшне.
Кайăк пек хуса çитеймĕп ĕнтĕ
Яш кунсен хаваслă ушкăнне.
Çав кунсем (кам чунĕ ĕмĕтсемсĕр?)
Тен, килес пулсассăн çаврăнса,
Вĕсемпе нимех тума пĕлмесĕр
Каялла эп парăп тавăрса.
Йыхăрать янравлă пурнăç маршĕ.
Юратма чĕнет тăван çĕре.
Çавăнпа, тен, кирлĕ-кирлĕ маршăн
Пăлханма пăрахнă чун-чĕре.
Ĕмĕтсем çула тухма хистеççĕ.
Ĕмĕтпе пурнакансем, васкар.
Алă сулчĕ тусăмсен Кӳкеçĕ.
Ман умра вĕр-çĕнĕ Шупашкар.