Вилнĕ, пĕтнĕ теççĕ улăпсем,
Юлнă тăприсем, çĕр куписем...
Ĕненес килмест çак сăмаха.
Тимлĕрех пăхсамăр çывăха:
Халĕ те вĕсем пурнаç иккен,
Çитĕнсех тăраç чăвашсенчен.
Çул хывать пĕри çӳл тӳпене,
Тишкерет тепри авалхине,
Виççĕмĕш тĕпчет эреш-тĕрре,
Хăш-пĕри сăнать чĕлхемĕре...
Улăпсем пур чух — пурнать чăваш,
Унăн пулĕ паттăрла малаш.
Халь пĕрне илер-и мухтаса?
Чăннипех вăл тивĕçлĕ чыса.
Кашкăр Хуначи текенскере
Сахал мар пĕлеççĕ тĕнчере.
Нимĕçпе якут, хакас çынни
Ăс ыйтса пĕлет унран çĕнни...
Пĕчĕк Хуначи пĕррехинче
Ларнă улăп тĕмески çинче.
Сасăпа калать сисмесĕрех:
«Эх, пуласчĕ улăп евĕрех...».
Ак хайхи такам çĕр айĕнчен
Сас парать: «Ăс пух ваттисенчен.
Ăспала çĕнтерĕн эс хĕçе,
Пуринчен малтан пуç тай ĕçе...».
Улăпа ача итленĕ тет,
Хушнине тума пикеннĕ тет,
Çак ĕçпе ялан супа-супа
Хăй те тухнă чаплă улăпа.
Пухнă вăл чăвашăн ăс-халне,
Пынă ăнтарса ун ĕç-хĕлне.
Сиплеме вĕрентрĕ пурнăçа
Пуç тайса ĕçе те тăнăçа.
Пархатарлă ĕмĕрхи йăла
Пытăринччĕ терĕ малалла.
Хамăрлăх — чăвашлăх тымарне
Татăлма ан парăр ĕмĕрне!..
Çакăн пек янрарĕ пилĕ ун,
Çав пилпе пайтах вăй илĕ чун.
Хуначи пичче, тавах сана,
Турă сывлăх патăрччĕ кăна...
Улăпсем пур чух — пурнать чăваш,
Унăн пулĕ паттăрла малаш.