Тахçанхи асаннесем,
эсĕр — пирĕн лириксем
(арсенчен ирттернĕ пулĕ!);
сирĕн ĕнчĕ пек куççулĕ
юрăра хальччен янрать,
ĕмĕр витĕр курăнать,
пур — хаваслă кулă та,
шухăлăх та пур унта!
Вунă ылтăн сăмахпа
тантăша-туса мухтанă,
вăтăр ĕнчĕ-ахахпа
эрешленĕ те чысланă
аçăра та аннĕре,
вăрмана та уй-хире!
Хăш-пĕр сăвăç пек, хăюсăр
аптраса эсир тăман:
«чун» тесен, танлаштарусăр,
«чун» тесех, вĕри чунтан
чун юрри эсир янратнă!
«Çĕнĕлĕхпе» те анратнă,
кисрентернĕ ăссене!
Хăш-пĕр чăрсăр хĕрсене
кив сăнар çырлахтарман-тăр,
генилĕх канма паман-тăр
(хăть пĕлмен те вăл мĕнне):
хăй ĕçне, япалине
çĕнĕлле курса ахлаттăр,
çĕнĕ сăнарпа мухтатăр
пĕлĕш, тантăш, тус-тăван!
«Ак çăварние тухсан
çĕнĕ юрă янратап-ха», —
тенĕ пирĕн пĕр-пĕр Сафо,
тен, вун пиллĕкри пике!
Тен, пулман кун пекки те —
хăй сисмесĕр, хăй туймасăр,
чунĕпе тек чăтаймасăр,
«йĕрсе юрласа ярса»,
тусĕн çуйнне курса
тем асилнĕ, тем сĕмленнĕ,
«Ах, пĕремĕк пек-çке», —
тенĕ çавă çутă çунана!
Янăратнă таврана:
«Çунисем те çуна пек-çке,
шур пĕремĕк арчи пек-çке!»
(Ай çапла кăна та мар,
танлаштарнă пит хастар:
«Вĕлтĕр çулçă эс, çунаçăм,
çул çинчи мерчен çырлаçăм!»)
Кам эс пулнă, турпикем,
хĕр ачам та асаннем?..
Янăранă шăнкăравĕ,
аякра — тус-тантăш шавĕ,
тăманра ак — сар çуни,
хăйпелех-ха — «тур çырни»;
юрĕ çаврăннă, вĕркенĕ,
хĕрĕ — тăлăпне пĕркеннĕ,
ялĕ — юлнă тĕтрере,
юрă — юлнă ĕмĕре.