Пуçларăн эс элек сутти...
Çитет, текех тăваймăн хур —
Таса куçпа хĕвел çути
Курмашкăн манăн тивĕç пур.
Иртнисене асилтерсе
Юнпа тек çăвăнмĕ суран.
Яраймăн эс мана тĕртсе
Пĕр тупнă шанчăклă çулран.
Иртни — ăшри сĕм суккăр туртăм,
Ултавлă шел, куçри ула.
Çак пĕчĕк йăнăша пула
Эп шутсăр пысăк хурлăх куртăм.
Чуна йĕпленĕ чикене
Тӳссе, хама çĕнетрĕм пĕтĕм.
Асап шăлне курсан тин пĕлтĕм —
Кам çын,
Кам кашкăр иккенне.