Çĕр çинче халь те пур-ха ун пек вырăнсем;
халь те йĕплĕ пралук речĕсем,
тутăхса кăнтараççĕ таçти вăрманта,
(Ай рифми те çапла, тупата:
тĕрлĕ çĕрĕш, тискер тунката.)
Хресченсем пек ĕçленĕ çынсем вăрçăра;
йĕррисем — халь те пур-мĕн вара:
дзочĕсен хӳмисем — платниксем тунă пек!
(Хĕрĕх çул — çĕрĕпе, кунĕпе
сас та çук, чун та çук... Йĕп-йĕпе...)
Арăмне, ачине ыталанă алсем
халь ăçта-ши?.. Ăçта — тумĕсем?
Сухара тарпа пиçнĕ хул-çурăм ăçта?
(Хам ятран эп ыйтам-ха тата:
ман атте хăш çĕрти вăрманта?)
Пĕр мел пур упрама: ассенче халь сире,
Трахвиме, Миккуле, Петĕре
ватă аннĕр лăпкать, — халь те эсĕр — яшсем...
(Ачаллах асăнаç — ачăрсем,
хăшĕсем халь — сиртен аслисем...)
Пур тата — ассене кĕреймесĕр юлни! —
Аттăн пĕтнĕ йĕрри, хĕрĕн туйсăр
юрри пăтрашать тӳпери турă мар турăра!
(Ай юррийĕн пуçламăш вара —
тахçанхи Çĕньялта, Нăрвашра...)
Амăшне, йăмăкне ыталанă алсем
халь ăçта-ши? Ăçта — тутрисем?
Вырмара тарпа пиçнĕ хул-çурăм ăçта?
(Хам ятран эп ыйтам-и тата:
ман пиччем хăш çĕрти вăрманта?)
Çав лăпланнă сассемшĕн-и пултăр ман çас...
Пурнăçа — вĕсем суннăн тăвас:
илемне хӳтĕлес — чĕрери çутăпа!
(Хам каланăччĕ—яш кăмăлпа:
пĕтĕм пурнăç вăл — çакă тупа...)