Ыйхине çухатрĕ Кулине кинемей. Пĕр эрне ĕнтĕ чăлăм куç хупаймасть. Эре, çĕрулми кăлармалла-çке, вăйлă çумăр хыççăн çĕр шанк хытса ларчĕ, кĕреçе те кĕмест.
Эппин, аншарли юхтармалла та... Карчăк-кăрчамас лаççа кĕрсе кĕçех хуран çакса та ячĕ. Валашкари шывĕ ăшăнсан ун вырăнне сиввине ярса пӳрте кĕрсе кайрĕ. Чашăк-тирĕк çурĕ вăл, урай сĕрчĕ. Çур сехетсенчен лаççа тухрĕ. Вутти лайăх çунать-ха, анчах темшĕн аншарлийĕ юхмасть. Кун пеккине халиччен курманччĕ вăл.
Вутпа аппаланса кӳршĕ хĕрарăмĕ Кĕтерне лаççа кĕрсе тăнине те асăрхамарĕ Кулине.
— Пӳрт алăкĕ çинче çăра çакăнса тăрать те пахчана тухса пăхам-ха терĕм. Пурăнать-и-ха ку, нимĕн те пулман-ши тесе.
— Çăра çакмасан такам та кĕрсе кайĕ терĕм те... Ара иртнĕ шăматкун сĕтел çинчи хĕвел çаврăнăш çăвне шăхăртса та кайрĕç.
— Мĕн ĕçлетĕн ара?
— Ĕçлесси-мĕнни. Эрех юхмасть вĕт-ха.
— Кӳр, хам пăхам. Пăрăхĕ тулса ларман-ши? Йĕркеллех. Эсĕ чустине татах хатĕрле-ха, кунта хуран йĕри-тавра сахал сĕрнĕ пулас.
— Чусти хатĕр-ха.
— Сĕрес умĕн хуранне уçса пăхас мар-и? — сĕнчĕ Кĕтерне.
— Мĕн пăхмалли пур ара унта? Икĕ витре пăрака ярса йĕркеллех сĕрсе тухрăм. Паян кăна эрех юхтармастăп вĕт эпĕ, — терĕ Кулине кӳренерех.
— Эсĕ кирек мĕн кала та, уçсах пăхам-ха, — кӳршĕ хуран хупăлчине çĕклерĕ. — Эсĕ мĕн, сывлăшран эрех юхтармастăн пулĕ те? Тав ту кӳршӳне, хурану çурăлса каятчĕ вĕт.
— Мĕн çурăлмалли унта? — Кулине вучах умне пырса пăхрĕ: хуран пуш-пушах иккен. — Вăт мыскара! Вăрăсем пăракана хурантанах ăкăртса кайнă, — пĕççине шарт çапрĕ кӳршĕ.