Килĕм-çуртăм кервен марччĕ,
Çил çӳретчĕ.
Çапах виçĕ кăвакарчăн
Çитĕнтертĕм.
Ялти ятăм чаплă марччĕ,
Хисеп çукчĕ.
Çапах виçĕ кăвакарчăн
Вĕçсе тухрĕ.
Вĕçсе тухрĕ виçĕ ывăл,
Виç вĕçевçĕ.
Чыс-мухтав сана, Çĕршывăм,
Ывăлсемшĕн.
Вĕçсе тухрĕç виççĕн харăс,
Пурте хӳхĕм.
Виççĕн виç еннелле кайреç —
Виçĕ çиçĕм.
Советсен çĕршывĕ аслă,
Вĕçме лайăх.
Явăнать çӳлте мăнаçлăн
Виçĕ кайăк.