Маргарита Туринге юрăçа
Çил çаврăнать те çаврăнать,
Çул йыхăрать те йыхăрать.
Кама пулин те çул пулать,
Кама пулин те чун хушать —
Санпа мана, манпа сана
Инçе çула туртать.
Шап-шурă кĕмĕл чечекле,
Шап-шурă йăлтăр пĕрчĕкле
Çут тĕнчере илемлĕ чух
Хĕвел ăшшиллĕ ик куçу
Манпа сана, санпа мана
Телейлĕ çул сунать.
Кун çаврăнать те таврăнать,
Çул пĕрлешет те уйрăлать.
Кампа пулин те çул ăнать,
Кампа пулин те чун юрлать —
Манра санран, санран манра
Чун юратни юлать.