Чечексем çинче мерчен те кĕмĕл,
Ăшă çил çӳрет вĕçкĕнленсе.
Ирхине çапла ман уçă кăмăл,
Пахчана тухатăп тем кĕтсе.
Пытанса мерчен ĕçет саркайăк,
Шăпчăк тăсса ячĕ юррине.
Шăпчăкпа пĕрле юрласчĕ манăн,
Ас илетĕп эпĕ савнине.
Вăл та шăпчăк евĕрех юрлатчĕ,
Чунтанах саватчĕ вăл мана.
Пире мĕншĕн пурнăç уйрăлтарчĕ,
Мĕншĕн пилсĕр пулчĕ самана?!..
Çунатна парсам мана, саркайăк,
Шăпчăк, кăтартсам савни çулне.
Сулăп та çунат, вĕçсе эп кайăп,
Шыраса чун савнă пикене.