Ман умрах юхать мăн Атăл.
Вăл çич-сакăр утăмра.
Кунĕн-çĕрĕн эп тăнлатăп
Вăл юрлан кĕвве-юрра.
Хумлă чух та, тикĕс чух та
Шав пăхатăп ун сăнне.
Вăл пĕр хушă лăпкă, çутă,
Вăл хура хăш-пĕр чухне.
Вăл йăваш та, вăл хаяр та,
Тĕплĕнрех пăхса илсен,
Чун-чĕреллĕ пек куратăн, —
Чĕрĕ мар-ши Атăл, — тен.
Çилсĕр чух вăл куçкĕски пек.
Курăнать унта тĕнче,
Çăлтăрсем çĕрле кĕту пек
Ялтăраççĕ ун çинче.
Каç пулсан, вăл лăпкăн, ăшшăн
Калаçать, шĕпĕлтетет.
Ун чухне темскер каласшăн,
Тем ыйтать вăл, тем кĕтет?
Сĕмсĕрленнĕ çиллĕ тăвăл
Хумхатма килсе тухсан,
Ахăрать, кĕрлет, шавлать вăл
Чарăнмассăн нихăçан.
Ун илемлĕ çутă сăнĕ
Хуралать, кăвакарать.
Çухалать илемĕ-мĕнĕ,
Вăл — хаяр çапăçура.
Атăл шывĕ пек ман çĕрĕм.
Çиллĕ тăвăл тухмасан,
Вăл ялан тӳлеккĕн тăрĕ.
Вăл çĕкленĕ, çил тухсан.