Туйсем кĕрлеççĕ те
Шавлаççĕ пуль ялта,
Такмак калаççĕ пуль
Çич-сакăр кĕрекеçĕ...
Туя чĕнсе
Хыпар килмерĕ ман пата, —
Инçетрисем ялан хыпар кĕтеççĕ...
Çук, ывăлăм килмерĕ-çке тесе
Мана анне те асăнчĕ пуль хурлăн.
Хăй килĕнче туй пуласса
Нумай çулсем хушши кĕтсе,
Ют туйсене курать вăл
Алăк урлă...
Тен, кӳршĕ хĕрĕ тухрĕ пуль качча,
Тен, ют яла
Вăл кайрĕ пуль, мăнтарăн...
Килмен çынна вăл манчĕ пуль пачах,
Анчах ăна мĕнпе халь асăнтарăн?
Тен, кӳршĕ хĕрĕ халь те туй туман?
Ют çĕрелле кайма та
Именет, тен?
Кашни каçах,
Анне патне пырса ларсан,
Ман çырусем çинчен ыйтса пĕлет, тен?
Хам чĕрене
Ăна эп парăттăм йăлтах!
Ман юрату... Нихçан та пулмĕ вĕçĕ.
Туйсем кĕрлерĕç те
Лăпланчĕç пуль ялта,
Лăпланчĕç пуль çич-сакăр кĕрекеçĕ.