Роза Андреевăна
1
Чăнах та, çуркуннешĕн чун хавас.
Мĕне сиссе-ши?
Шап-шуррăн выртнă юр
сĕлкĕшленсе, лапраланса
юхса кайнишĕн-ши?
Çыпçăнакан çăрăлчăка пула-ши?
Хаваслăх вăй илет
асар-писер арпашуран иртсе
çулçăланас, чечекленес кунсем çитсен.
2
Шарлать шыв-шур.
Урам хушшипеле юхать çур шывĕ,
паллах, тăвалла мар, анаталла.
Шарлать шыв-шур —
лĕп çумăр шывĕ, пăрлă çумăр шывĕ —
паллах, çӳлелле мар, аялалла.
Умра мĕн пур?
Е сиплĕ ăшă-и, е хăртмăш сивĕ?
Пур вăл та, ку та пурнăçра, паллах.
3
Иртнĕ кунăн çути те сӳнмест,
тĕрлĕрен чĕтренсе чӳхенет:
сар шевлен савтарас юхăмне
хура тĕс те кĕме именмест.
Кун пулать, кун иртет, кун шăвать...
Пурнăçра малашпа пурăнар.
Иртнинче ыррине астăвар —
хурипе хурланни хур тăвать.
4
Эп ӳрĕк-сӳрĕке
ăша хывман, хываймăп.
Салхуллă çӳрекен —
эп — кичеме саваймăп.
Силлерĕм йывăçа,
çие чĕр сывлăм тăкрăм.
Чăр тинкерен куçа
хăюллăн витĕр пăхрăм.
Çывхартăр, çуталса
чĕремпеле пĕр тĕслĕн:
хăй пек — шалтан таса,
хăй пек — ӳпкевсĕр ĕçлĕ.
5
Вăхăта хĕвелпе тĕрĕслетпĕр,
хамăра вăхăтпа тĕрĕслетпĕр.
Сар шевле çеммипе кĕвĕлетпĕр,
юрăпа йăпанатпăр, ĕçлетпĕр.
Вăй парать тăван çĕрĕмĕр, парĕ...
Çавĕн пек пирĕн çăлтăр каларĕ.
6
Мана пĕри ĕмĕрлĕхех тăлласшăн —
чĕремçĕм пур тата хĕрӳллĕрех;
мана пĕри шартлаттарсах тылласшăн —
шăнăрăмсем шанмаççĕ пурпĕрех.
Вăл пăчланать. Ĕмĕрлĕхех пăчлантăр.
Таптакана çул пулмĕ халăхра.
Çакна чун-чĕрепе туйса ăнлантăм
тăпра шăрши витернĕ пурнăçра.
7
Пĕрмай кулса ăçтан-ха пурăнăн
йĕпе-сапа вăхăтĕнче?
Пĕрмай кичем ăçтан-ха курăнăн,
хĕвеллĕ кун пулсан тĕнчен?
Тăн-тăн хаваслăх, çутă тунсăх
усраймасассăн кăкăрта,
утса çӳрен этем те — чунсăр,
çынна хăй çумĕнчен тартать.
8
Канаш — хама, канаш — юлташăма,
кам пулăшу кĕтет, çавна — канашăм.
Харпăр хăйне çухатасран каласшăн
эп ирĕк саслăн татăклă сăмах.
Ĕçлер — ĕçе хастаррăн парăнса:
хавхаланса, тапаланса, хăпмасăр,
пуймасăр, юхăнмасăр, хапсăнмасăр, —
пурнар чыса çеç вĕçĕм пуç тайса.
9
(Александр Блокран)
О, эп пурнасшăн вилесле:
Мĕн пур — ĕмĕрлĕхе юлинччĕ,
Мĕн чунсăр — чĕрĕлĕх илинччĕ,
Пулманнине — тăвас килет!
Ан тив, хуплатăр йывăр ыйхă,
Ан тив, эп чыхăнам унпа, —
Пуласлăхра, тен, калĕ сыхлăн
Яш çын хаваслă сасăпа:
Каçарăпăр салхушăн — çав-и
Ăна чĕрех усраканни?
Ырра, çутта тăсан ача вăл,
Вăл — ирĕклĕх чăна тухни!
10
Хупмастăп куçа, хăлхана мăкламастăп —
пăхатăп, итлетĕп.
Пурне те — тем тĕрлĕ ӳкерчĕк те, сас та -
куратăп, илтетĕп.
Йĕрки-йĕркипе шухăшлатăп, пĕлетĕп,
çич хут тĕрĕслетĕп.
Сар кайăк юрланă чухне — киленетĕп,
илемлĕх илетĕп,
илемлĕх кӳретĕп.