Кунсем те каçсем шутласа эс мĕн чухлĕ ан пурăн,
Пĕлсе пĕтереймĕн пĕрех савнăçпа хĕн-хура.
Ав, çĕмĕрт çеçки те, шуратнă пир тейĕн, шап-шурă,
Анчах çырлисем, çырлисем мĕншĕн йĕпкĕн хура?
Тĕнчемĕр — улшуç. Ылмашаççĕ çут тухăç, сив анăç.
Кам пулĕ тӳре? Улшăну саккунне пăхăнса
Паян тивĕçпе килмелле пек шур çĕмĕртлĕ савнăç,
Анчах хура хуйăх хурах пек тухать шăвăнса.
Шап-шур çеçкерен шурă-шурă çырла, ай, пулмарĕ.
Епле, тутансан, вăл чĕлхе-çăвара типетет.
Эй, хуйăх, эс сивĕннĕ савăнăç пулăмĕ мар-и? —
Сана астивсен, чун-чĕре хуралса пиçĕхет.
Хура çĕмĕртрен шур саппунлă çеçке тухса ларĕ.
Çак мар-ши улшуçăн тĕллевĕ тесе сĕмленен.
Эй, саврнăç, эс хура хуйăхăн мăшăрĕ мар-и —
Чĕре суранне, арăм пек, хăвшăнах, тен, сиплен.
Телей те инкек хушшинче эс мĕн чухлĕ ан пурăн,
Пĕлсе пĕтереймĕн пĕрех савнăçпа хĕн-хура.
Ав, çĕмĕрт çеçки те, шуратнă пир тейĕн, шап-шурă,
Анчах çырлисем, çырлисем мĕншĕн йĕпкĕн хура?
Арпашать çут тĕнче: умăра те тăшман,
Те çăлма тухакан хурăнташ-хунтăш ман...
Саккăрла явăнса çаврăнать çил-тăман, —
Вăй та çук, май та çук ăна хирĕç тăма.
Урам урлă йĕрекен выртса тухнă кĕртсем —
Картишне кĕреймен вилнĕ шурă хурсем.
...Тен, çапла ир енне майĕпен вăй пĕтсен
Ӳкĕп те нихăçан та тăраймăп, туссем.
Саккăрла явăнса çаврăнан самана
Унчченхи çул çине кăларать-ши мана?
Шурă-шурă кĕртсем, вилнĕ шурă хурсем —
Сăввăма кĕреймен шурă шухăшсем...