Тупнă сăмахсене
шăрçан-шăрçан тиретĕп,
эп вĕсене
йĕркесене тиретĕп.
Тиретĕп те,
виç çăлтăртан
çакса яратăп,
тиретĕп те,
тен, кам пулсан та курĕ-ха тесе,
тен, теприне вăл кирлĕ пулĕ-ха тесе,
виç çăлтăртан
çакса яратăп.
Ман сăввăмсем,
вĕр çĕннисем те киввисем,
йăлтах тупнăскерсем.
Эп вĕсене
чăн-чăн хуçи, тен, курĕ-ха тесе,
хуçи курсассăн илĕ-ха тесе
уй-хир пек уçă хут çине
пухса хуратăп.
Хураçырма. Июлĕн 15-мĕшĕ.