Кашни ир кӳлĕре
Мăшăр акăш çӳренĕ,
Инçетри ют çĕре
Çул тытма хатĕрленнĕ.
Шур тумне çут шывпа тек чӳхенĕ.
Вĕсемпе çут çанталăк киленнĕ.
Кĕрхи ир çут кӳлле
Вĕçсе аннă ик акăш
Ах, хăрушă…
Ак тахăш
Пăшалпа. Вăл тĕллет.
Кĕрĕслетрĕ.
Акăш тумĕ хĕрелчĕ.
Кур, çӳле вăй пухса вăл çĕкленчĕ.
Кур, çĕмрен пек вĕçет.
Нăйкăшмарĕ, – юрларĕ!
Вĕçесси тек пулмарĕ.
Паттăр акăш ӳкет…
Акăшсем вилес чух нăйкăшмаççĕ,
Акăшсем вилес умĕн юрлаççĕ!