Улăхĕпе-улăхĕпе çӳрерĕм,
Сан сăну пек чечек шыраса.
Тин çуралнă мăкăнь шăп сан пек,
Çеçки çинче сывлăм — куллу пек.
Татса илес терĕм — каçарах —
Ма тататăн терĕç сывлăмлах.
Пахчипеле-пахчипеле çӳрерĕм,
Сан куçу пек çырла шыраса.
Пиçсех çитмен çĕмĕрт куç пекех,
Санăнни пек хăмăр тĕслĕрех.
Татса илес терĕм — каçарах —
Ма тататăн терĕç хăмăрлах.
Çĕрĕпеле-çĕрĕпеле çӳрерĕм,
Саншăн ăшă сăмах шыраса.
Чунăм теес — чунна витеймест,
Тусăм теес — хăю çитеймест,
Калаттăм пуль калас сăмахах
Пулнă пулсан эс хам тантăшах.