Çак çĕр çине çураличчен —
Сар кайăксен сăмсисенчен
Эпир, тет, сас параттăмăр;
Пăхаттăмăр чечексенчен,
Ташлаттăмăр шевлесенче...
Çĕршывăм, çĕрĕм-шывăмçăм,
Сĕткенӳпе чун сывă ман.
Уй-хирӳсем, çыр-варусем —
Асаттесен ячĕпелен.
Ĕмĕр-ĕмĕр, çĕршывăмçăм
Çав уй-хиртен тăван-пĕтен
Пирĕн чуна пуçтарнă, тен.
Юнра-чунра, çĕршывăмçăм,
Çав çĕр сĕткен сип шывĕ ман.
Çĕр айĕнче тăван выртать,
Çĕр айĕнче аттем выртать... —
Сана эп, çĕрĕм-шывăмçăм,
Тăван тесе ыталăп та,
Аттем тесе чуп тăвăп та —
Юратнă çĕрĕм-шывăмçăм,
Эс — пурнăçăм, çут шанăçăм.