Йывăр инкек ăшăмра
Кăшлать чĕрене,
Ĕмĕр-ĕмĕр ман умра
Карать çăварне;
Чипер тăнă çĕртенех
Тĕртсе хăвалать;
Вăхăт çитнĕ-çитменех
Çӳçе шуратать.
Хăçан йывăр асапсем
Пĕтĕç ĕмĕтĕн?
Хăçан шанчăклă кунсем
Çитĕç ĕмĕтĕн?
Кĕçĕр тĕттĕм, сивĕ çĕр,
Çил улать, йĕрет...
Ман ăш-чикре вут-хĕм-тĕр,
Пуçăм ишĕлет.
Пусрĕ хуйхă пуçăма,
Шухăш пăтранать.
Юрлама мар, калаçма
Халăм çухалать.
Анне мĕлки куç умне
Сисиччен тăчĕ,
Чун сасси пек сассине
Вăл ирĕк пачĕ.
Ах, аннем, анне, аннем,
Хытă ан кăшкăр
Мана вăйсăршăн, аннем,
Кăплах ан хăтăр!
Анчах анне хĕрхенмест,
Чарăнмасть, ятлать,
Ман сăмаха итлемест,
Йĕнинчен кулать.
«Ĕмĕр тăран чул пусман
Картлашки çине
Эпĕ сана тăратсан,
Турăн-и ĕçне?
Эпĕ сана вăй-хăват
Парсассăн, кайран:
«Пуçупа тĕнче тапрат»,
Тесе хăварсан —
Эсĕ эпĕ хушнă пек
Пĕр чарăнмасăр,
Тар-шур куран тарçă пек,
Канас шухăшсăр
Ĕçлерĕн-и, ывăлăм?
Кала аннӳне!»
«Аннем, юратнă чунăм,
Пĕлсем хĕрхенме».
«Ан чĕн! Чарăн! Куратăп,
Ăссăр çăмăлттай!
Ĕмĕрлĕхе хăваратăп,
Аяккалла кай!
Кунĕн-çĕрĕн кускалакан
Вĕт-шак пулма мар,
Упаленсе йăлăнакан
Кĕлмĕç пулма мар,
Çынсем пек пулас тесе
Мул шырама мар,
Пĕр-ик сехет килленсе
Пăхам, теме мар, —
Сана эпĕ çутлăха
Кăтартам, ачам!
Акă мĕншĕн (хыт тăнла)
Каласа парам:
Тĕнче тĕксĕм тĕттĕмре
Пăтранать пулсан,
Суя сулхăн сӳтлĕхре
Сулланать пулсан,
Пĕрне тупсан, урăхне
Тупрăм, тет пулсан —
Каçхи тĕттĕм варрине
Пытанать пулсан —
Эсе пĕччен тĕнчерен
Уйăрăлса тăр!
Эсĕ пĕччен хĕвелтен
Питне ан пытар!
Суя çулпа каякан
Харсăр çынсене
Хурçа çурса татакан
Кăтарт чĕлхӳне!
Эпĕ панă ĕмĕрлĕх
Сăмах хăватне
Хăрамасăр хĕрӳллех
Пĕлтер çынсене!»
Çакă сăмах хăлхана
Янратса ячĕ.
Анне каллех тăлăха
Мана хăварчĕ.