Улатимĕр хапхинчен тухман-ха вăл...
Калаçуран
Улатимĕр хапхи, ай, хапха,
Ытла йывăр иккен хăлăпĕ.
Хальччен пухнă вăя пĕтерет,
Йăлтăр çиçнĕ куçа сӳнтерет.
Улатимĕр хапхи, ай, хапха,
Тĕттĕм каç сарать сар кунра.
Чĕрĕ пурнăç сăнне пĕтерет,
Çулçӳревçĕ çулне çĕтерет.
Улатимĕр хапхи, ай, хапха,
Мĕн пулсан та — хапхаран тухам.
Хăрнă тымар йăл илсе янă пек,
Чул çĕмĕрсе сар чечек шăтнă пек.